بلوچ اسٹوڈنٹس آرگنائزیشن آزاد ءِ جارکش شولان بلوچ ءَ وتی درشان ءَ گوشتگ کہ نمیرانیں سنگت سناء بلوچ آجوئی جھد ءِ ھما آشوبی رھشون اَت کہ دژمن ءِ تیر ئِے سینگ ءَ وارت اَنت بلے چہ راجی مول ءَ پد کِنز نہ بوت۔ راجی جھد ءَ سنگت سنا ءِ پیمیں دلیریں سیاسی جھدکارانی یکشلیں جھد ءُ کُربانیانی برورد اِنت کہ اے آجوئی ءِ سپر نزور نہ تر ایت ءُ ناکہ جھدکار دمانے چہ وتی مول ءَ پد کِنز بنت۔ آئی ءِ دلیری ءُ پہ بلوچ ڈیھ ءِ دوبر آجوئی ءَ دِیستگیں واب مرچی ھمک بلوچ پُسگ ءِ دلاں رُستگ ءُ آئی ءِ ترندیں آشوبی کلوہ ھمک کوچگ ءُ شھراں تالان اِنت۔
آئی ءَ گوشتگ کہ پاکستانی زالمیں اِستان ءَ چوشیں ھزارانی کچ ءَ بلوچ سیاسی جھدکار ءُ رھشون تیر باران کُتگ کہ مروچی بلوچ راجی دپتر ءَ نمیران اَنت۔ اے ھما سر بوتگ اَنت کہ آیاں وتی زِند ءِ ھمک شئے پہ وتی راج ءُ ڈیھ ءِ باندات ءَ ببا داتگ ءُ داں گُڈی ساہ ءَ گوں راجی مول ءَ ھمگرنچ بوتگ اَنت۔ اے سرانی روگ پہ راجی جھد ءَ یک مزنیں تاوانے ءَ ابید پہ جھدکاراں یک مھکمیں لیکہ یے ءِ درس اِنت کہ اے راجی جھد پہ سرانی گُڈگ ءَ نزور نہ بیت بلکیں مروچی بلوچ راج ءَ گوں وتی جھد ءَ گوں پدر کُتگ کہ آ چہ ھونانی شھجواں ساہ زور ایت ءُ پہ دژمن ءَ کھرے جوڑ بیت۔
سنگت سنا بلوچ آشوب ءِ ھما رُژن اَت کوہ ء سلیمان ءِ مھکمیں کوھاں بہ گِر داں مکُران ءِ مرگاپ ءِ سِکاں تالان اَت۔ آئی ءَ وتی دورچاری ءَ گوں بلوچ سیاسی چاگرد مھکم کنگ ءِ سر ءَ جھد کُت۔ ھما وھد ءَ کہ بلوچ راجی سیاست ءِ تہ ءَ جنگ ءُ کُشگ، ژانگولیں لاشانی چگل دیگ، بلوچ پُسگانی زوریں بیگواھی ءَ ھوار ھر پیمیں اِستانی زوراکی وتی زور ءَ بیت بلے سنگت اے جاوراں چہ تچگ ءِ جاہ ءَ مھکم ءُ دلیری ءَ گوں اوشت ایت ءُ بلوچ ورنایانی سیاسی ھیلکاری ءَ کنگ ءَ بیت ءُ بلوچ سرڈگار ءِ سر ءَ نِشتگیں بلوچ مھلوک ءَ آشوب ءِ رُژن ءَ تالان کنگ ءَ بیت۔
آئی ءَ گوشتگ کہ اے ھما روچ اِنت کہ پاکستانی زالمیں اِستان آئی ءِ تیر سُپتگیں جون ءَ ماں مُرگاپ ءِ سکاں چگل دنت بلے آئی ءِ رِتکگیں ھوناں چہ پُل رُد ایت کہ مرچی مھکمیں جھدکارانی دروشم ءَ بلوچ ڈیھ ءِ پہ دوبر آجوئی ءَ جھد ءَ اَنت۔ بلوچ ءِ ھمک ورنا ءُ جھدکاراں آئی ءِ دلیری وتی تہ ءَ جاہ دیگی اِنت ءُ آئی ءِ دیستگیں واب ءَ بزانت دیگ ءَ بلوچ راجی آجوئی جھد پِگری ءُ جوڑشتی بنیاد ءَ گیش مھکم کنگی اِنت۔
بنشون: درشان. اکس: مونوگرام
