بلوچ لبریشن آرمی ( بی ایل اے ) ءِ جارکش جیئند بلوچءَو تی درشانءَ گوشتگ کہ بی ایل اے ءِ نیمگءَ آپریشن ھیروپ ءِ دومی بھر شش روچی شھری کاروائیانی آسر ءَ بوتگ، بلوچ راجی گھگیری ءِ نوکیں گوستانک ءِ چہ درساں مستریں دراجکش،ترند ءُ مھکمیں پوجی مھمے زانگ بوتگ۔ اے آپریشن 31 جنوری ءِ سھب ءَ بندات بوتگءُ شش پروری ءَ بیگاہ ءِ چار ءَ آسر ءَ وتی نشانگاں سر بوگ ءَ پد آسر بوتگ۔ اے میانءَ بلوچستان ءِ چاردہ شھر نشانگ ءَ بوتگ اَنت۔ بلوچ سرمچاراں نہ تھنا یکیں وھد ءَ ارش کرتگ بلکیں دژمنءِ باز چوکی، پوجی شوربندی ءُ شھری ھند داشتگ اَنت۔ بازیں شھراں بی ایل اے ءِ ٹولی یکشل ءَ داں شش روچ ءَ زورگریں پوج ءَ پد کز کنگ ءَ بوتگ ۔ ایشی آسر ءَ دژمن ءَ سیاسی، سسائی ءُ پوجی بھرگ ءَ شریں وڑے ءَ تاوان بوتگ۔
آئی ءَ گوشتگ کہ اے آپریشن ءِ میان ءَ سرجم ءَ بی ایل اے ءِ نود ءُ سے سرمچار شھید بوتگ۔ آیانی تہ ءَ مجید برگیڈ ءِ پنجاہ پدائی، پتے اسکواڈ ءِ بیست ءُ شش، اسپیشل ٹیکٹیکل آپریشنز اسکواڈ (ایس ٹی او ایس)ءِ ھبدہ سرمچار ھوار اِنت۔ اے مزنیں کاروائی ءَ بی ایل اے ءِ درسیں بھرگاں بھر زرتگ۔ آیانی تہ ءَ مجید برگیڈ، ایس ٹی او ایس ، پتے اسکواڈ، زراب( چیریں بھرگ) ءُ ھکل ( رسانکدری بھرگ ) ھوار بوتگ۔ اے کاروائیانی میانءَ دژمن ءِ سے سد ءُ شستءُ دو ءَ گیش کارمند مرتگ کہ آیانی تہ ءَ زورگریں پاکستانی پوج، ایپ سی، پولیس ءُ ریاست ءِ چیردستیں کشندہ ٹولی ءِ کارمند ھوار اَنت۔ اے کاروائی ءِ میان ءَ ھبدہ کارمند دزگیر کرتگ کہ آیانی تہ ءَ دہ کارمند بلوچ بوگ ءِ بنیاد ءَ کڈن کرتگ ءُ یل داتگ، ھپت کارمند انگت ءَ بندیگ اِنت۔ آیانی سر ءَ بلوچ چکچینی ءَ ھوار بوگ ءِ کیس ءَ کن ایں۔ اے میانءَ درزنانی کچ ءَ پوجی بنجاہ تباہ کرتگ، سلاہ زرتگ اَنت ءُ گوں یک مھکمیں بلوچ گھگیری یے ءِ رد ءَ زورگریں ریاست ءِ جنگی گھتری سکا تاوان داتگ اَنت۔
جارکش ءَ گوشتگ کہ آپریشن ءِ آسری ءَ بی ایل اے ءَ ھمے پیش داشتگ کہ ھیروپ ءِ دومی بھر درسیں مولاں سوبین بوتگ۔ اے کاروائیءِ بنکی نشانگ سے بوتگ اَنت، بنداتءَ ھمے پیش دارگی بوتگ کہ بلوچ سرمچار وتی منشا ءِ رد ءَ شھری بنجاھانی سر ءَ ارشءُ دستیگ کرت کن اَنت۔ دومی بلوچ راج ءَ ھمے کلوہ دیگی بوتگ کہ اے گھگیری مچی بیسہ ءُ گل ءِ توانمندی ءِ سر ءَ اِنت۔ سیمی زورگریں پوج ءِ ھمے گروناکی پروشگی بوتگ کہ سرجمیں بلوچستانءَ بے چیلنجَءَ واکداری ءِ ٹاپار بوتگ۔
آئی ءَ گوشتگ کہ شھری جنگءِ گچین کنگ ءِ مول ھمے بوتگ کہ شھراں زورگریں پوج وتی مھکمیں بنجاہ سرپد بیت، پہ زانت اے گچین کنگ بوتگ دانکہ ھمے چیز ءَ تچک بہ کن ایں کہ بلوچ ءِ گھگیری تھنا گوں کوھاں بندوک نہ اِنت۔ بی ایل اےءَ مزنیں پوجی بنجل، چوکی ءُ شھری بھرگ داں دیر ءَ پمشکا دستیگ کرتگ اَنت دانکہ بلوچ مھلوک ءُ میان استمانی تک ءَ ھمے کلوہ ءَ بدے ایں کہ اے زرمبشت وتی شوربندی ءَ وت ٹھین ایت ءُ جنگ ءِ پڑا وتی لوٹانی پیلو کنگ ءَ بودناکی ھست۔
جارکش ءَ گوشتگ کہ زورگریں ریاست ءِ نیمگءَمئے جھد ءَ گوں ناشرکار یا مذھبی ناشرکاراں ھمگرنچ کنگ ءِ شوربندی یے ءِ بھر اِنت، ایشی مول یک سیاسی زرمبشتے ءِ راستی ءِ ھلاس کنگ اِنت۔ اے زرمبشت ءِ سروکیءَ وانندگ بھرگ نودربر، پروپیسر، وکیل، ڈاکٹر، انجیئنر، دانشور ءُ بلوچ چاگرد ءِ جتائیں بھرگاں سیادی داروکیں مرد ءُ زالبول کنگ ءَ اَنت۔اے جھد ءِ بنیاد یک آجو ءُ وتواکیں سرڈگارےءِ لوٹ اِنت کہ اود ءَ آجوئی، زانشت، جان سلامتی، شرپ ءُ مڈیانی واکداری تھنا لھتیں مردمانی مہ بیت بلکیں ھمک شھری ءِ ھک اِنت۔
آئی ءَ گوشتگ کہ ھما مردماں گوست ءَ پرایمنءُ سیاسی جھد کرتگ آیانی سر ءَ دروگیں کیس جنگ بوتگ، زور بیگواھی ءُ گوں درکانودی کوش ءَ بے توار کنگ بوتگ اَنت۔ مرچی بلوچستانءَ چوشیں گس پشت نہ کپتگ کہ آ چہ ریاستی زوراکیاں سانمند نہ اِنت۔ نودربر چہ وانگجاھاں بیگواہ کنگ بوگ ءَا َنت ءُ پر ایمنیں زھرشانی کنوکیں زالبول آزار دیگ ءُ نشانگ کنگ بنت، چہ ایشی ءَ پد بازیں مردمانی کِر ءَ ابید چہ سلاہ بندیں گھگیری ءَ دگہ ھچ راہ پشت نہ کپتگ۔
آئیءَ گوشتگ کہ ما چہ میان استمانی گل، کانود ءَ واکداری ءِ گپ جنوکیں ڈیھ ءُ گوں میان استمانی ادارھاں لوٹ کن ایں کہ آ بلوچستان ءَ زورگریں پوج ءِ دستءَ بیوکیں زوراکیاں بہ من اَنت۔ چہ آئی ءَ زورگریءِ ھلاسی ءُ چہ یک دراجکشیں وھدے ءَ چہ وتی توار ءَ زبھریں پہ بلوچ راجءَ انساپ ءَ سپارتی زور درکار اِنت۔
جارکش ءَ گوشتگ کہ ما ڈنی کمپنی ءُ میان استمانی باپاراں کڈن کن ایں کہ بلوچستانءِ مڈیانی لٹ ءُ پل گوں پاکستانءَ شرکاری زورگپتی ءِ کمکاری زانگ بیت۔ یک آجوئیں راجے ءَ بستار ءَ ما وتی سرڈگار ءِ سر ءَ پاکستان ءِ واکداری ءُ ٹاپاراں نہ من ایں۔ کجام ادارہ پاکستانءِ نوک آبادکاری شوربندیءَ ھوار بیت آ ھمے آسر ءَ گند ایت ءُ آئی ساڑی بوگءُ پوجی مشینری ءَ چہ ایشی گستا سرپد نہ ایں۔
جیھند بلوچ ءَ درشان ءِ گڈی ءَ گوشتگ کہ ما گوں دل ءِ جھلانکیاں درسیں مرد ءُ زالبولانی منت واریں کہ آیاں ھیروپ آپریشن ءِ دومی بھر ءِ میان ءَ گوں بی ایل اے ءَ کمک کرتگ۔ چہ چیریں بھرگ ءَ بگر داں مالی کمک ءَ، چہ مچی سزا ءَ ابیدگوں تمردی ءَ وتی راجی پرز پیلو کرتگ۔ ایش بنداتے بوتگءُ ایشی سوبمندی سرجمیں راج ئیگ اِنت۔ ما یکشل ءَ واتر کائیں، ھمک باریگءَ گیشتر جاڑیگ ءُ ھوار بہ اینءُ کائیں، داں ھما وھد ءَ کہ زورگریں پوج چہ مئے سرڈگار ءَ درکپگ ءَ لاچار بہ بیت۔
بنشون: درشان اکس: زرمبش
