شال: بلوچ یکجھتی کمیٹی ءِ نیمگ ءَ بلوچ چکچینی ءِ بگیری ءَ برجاھیں مچی ءَ ڈاکٹر ماہ رنگ ءَ 25 جنوری ءَ بلوچ چکچینی ءِ روچ ءِ دارگ ءِ جار جتگ ءُ گوشتگ کہ 25 جنوری 2014 ءَ توتک ءَ مچی مانشجاھے ءَ دوسد ءِ کچ ءَ لاش دزکپتگ کہ آ بے کس لیکگ بوتگ اَنت، آ بے کس نہ اَنت بلوچ راج ئیگ اَنت۔
ڈاکٹر ماہ رنگ ءَ گوشتگ کہ ریاست ھما ئی جند ءِ زبان ءَ سرپد کنگی اِنت، پمیشکا کہ آ گنگ ءُ کر اِنت، مارا پہ وتی سرڈگار ءِ پھریزگ ءَ سلاہ ھم ھست۔ آ انگت ءَ اے گپ ءَ نہ زان اَنت کہ ھما زورگپتانی بوٹاں چکگ ءَ اَنت بلوچاں آیان ءَ ھاک وارینتگ۔ اے ریاست ءِ کِر ءَ ھمے یکیں زور بوتگ کہ آ بلوچاں کجام وڑ ءَ بہ ترسین ایت، آئی وتی درسیں مشنیری بلوچ ءِ سر ءَ کارمرز کرتگ۔ ریاست ءَ یک یک ءَ آوار جتگ ءُ لاش چگل داتگ اَنت بلے آئی اے راج ترسینت نہ کرتگ ءُ آ ترس ما ھلاس کرتگ۔
آئی ءَ گوشتگ کہ من ءَ ھمے مچی ءِ میان ءَ آشوب ءِ بُو بوگ ءَ اِنت، ھما آشوب کہ آئی ءِ واب مئے شھیداں دیستگ۔ پمیشکا چہ پانزہ سالاں اے مات تلوسگ ءَ اَنت، ایشانی چمانی ارس ھشک بوتگ اَنت۔ پاکستان ءِ ھونواراں بلوچ ءِ ورنایانی ھون تنگ اتگ اَنت۔ گوستانک ءِ تہ ءَ ھمے نبیسگ بیت کہ بلوچاں ریاست پروش داتگ۔ اے مئے بازیں شھیدانی دیمونیانی برورد اِنت کہ ما مرچی پاکستان ریاست ءِ زوراکیانی بگیری ءَ اوشتاتگیں۔
ڈاکٹر ماہ رنگ ءَ گوشتگ کہ وتگڑیں راجدوست بلوچ ءِ زور بیگواھیں مردمانی بارو ءَ سیاست کنگ ءَ اَنت آ چیراندری بلوچ ءِ ھونانی سودا ءَ جنگ ءَ اَنت۔ پاکستانی لشکر ھما وڑ ھیل دیگ بوتگ کہ بلوچانی گون ءَ کجام وڑ ءَ زوراکی کنگی اِنت۔ چہ تربت ءَ پہ بالاچ ءَ درکپتگیں روانک نوں درسیں نزوریں بلوچانی توار جوڑ بوتگ۔ ما دیم پہ اسلام آباد ءَ رھادگ بوتگیں ما اے گپ زانت اسلام آباد مئے گپ ءَ گوش نہ دار ایت بلے ما اے ریاست تیوگیں جھان ءِ دیم ءَ پدر کرتگ۔
آئی ءَ گوشتگ کہ بلوچ جزباتی نہ اَنت لکیھی اَنت، اے مئے سر ءَ کدی ھم رھم نہ کنت، من ببا یا مباں بلے اے زرمبشت شمئے امانت اِنت۔ اے مچی انچائیں مچی یے نہ اِنت بلکیں تیوگیں جھان ءِ بلوچانی توار اِنت۔ بلوچستان ءَ برجاھیں زوریں بیگواھی، لشکرکشی، کشت ءُ کوش ءُ بلوچانی لڈینگ ءُ دگہ جاھاں باھوٹی ءِ زند گوزینگ ءِ بگیری ءَ اِنت۔ اے سرڈگار مھراب ھان، ابدالزیز کرد، نواب ھیربکش مری، بالاچ ءُ بانوک کریمہ ءِ سرڈگار اِنت۔
ڈاکٹر ماہ رنگ ءَ گوشتگ کہ مرچی بیا پچار مئے بلوچانی آمیدگس ءَ شمئے کوریں آمیدگس ءَ مارا زور دارگ ءِ جھد کرتگ۔ پہ ریاست ءِ درسیں شونداتانی بگیری ءَ یکجاہ بہ بہ اِت، پہ راجی زندمان ءَ وتی زندمان ءَ ببا بدے اِت۔ ھما مردماں بلوچانی بھر ءُ بانگ کنگ ءِ جھد کرتگ ما آیان ءَ ھمے کلوہ ءَ دیاں کہ مرچی بلوچ یکجاہ بوتگ اَنت۔ اے 1948 نہ اِنت 2024 اِنت، اے بنگلہ دیش نہ اِنت بلوچستان اِنت۔ اے زرمبشت بلوچ ءِ پدریچ ءِ رکینگ ءِ زرمبشت اِنت ءُ اے زرمبشت ھمے وڑ ءَ برجاہ بیت۔
آئی ءَ گوشتگ کہ اے مچی ءَ ھواریں بلوچ دانشور ءُ نبشتہ کارانی گون ءَ ھمے لوٹ ءَ کناں کہ آ بلوچ راج ءِ سر ءَ برجاھیں ریاست ءِ زوراکیانی بگیری ءَ نبشتہ بہ کن اَنت ءُ ایشاں گوستانک ءِ بھر بہ کن اَنت۔
