نوشکی ءَ چہ پاکستانی پوج ءِ نیمگ ءَ لس آبادیانی سر ءَ تیرگواری ءُ ڈرون ارشاں باز مردم بیران ءُ ٹپی بوتگ۔
بنشون ءِ رد ءَ چہ پوج ءِ ڈرون اُرش ءُ تیرگواری ءَ ٹپی بوتگیں مردمانی نادراھجاہ ءَ بروکیں ایمبولینس گاڑی ءِ سر ءَ پوج ءَ تیرگواری کرتگ کہ ایشی آسر ءَ ایمبولینس ءِ ڈرائیور ھشمت الی ٹپی بوتگ۔
چہ ایشی ءَ پیش ھم کیڈٹ کالج ءِ نزیک ءَ ایمبولینس گاڑی ءِ سر ءَ چہ پاکستانی پوج ءِ تیرگواری ءَ ڈرائیورے بیران بوتگ۔
ھمے وڑ ءَ چہ پاکستانی پوج ءِ تیرگواری ءَ نامداریں گشندہ ھسین اسیر ءِ برات ھسن بسری ھم بیران بوتگ۔
نوشکی ءِ ھند کازی آباد ءَ چہ پوج ءِ تیرگواری ءَ دگہ زھگے شھزاد جان بیران بوتگ۔ چہ آئی ءَ پیش پوج ءِ ڈرون ارش ءَ دیدگ نامیں زھگے بیران بوتگ اَت۔
نوشکی ءَ پنچ روچ اِنت کہ پاکستانی پوج ءُ سلاہ بندیں مردمانی میان ءَ میڑ برجاہ اِنت۔
اے کاروائی چہ بلوچ لبریشن آرمی ءِ نیمگ ءَ ھیروپ آپریشن ءِ دومی بھر ءِ درگت ءَ بندات کنگ بوتگ اَت ءُ بلوچستان ءِ دوازدہ شھراں کاروائی کنگ بوتگ۔
بنشون: رسانکدر. اکس: زرمبش
