بلوچ یکجھتی کمیٹی ءِ سروک سمی دین ءَ وتی درشانے ءَ گوشتگ کہ کمبرانی کھول گوستگیں دہ سال اِنت کہ ریاستی زوراکی ءُ مچی سزایانی دیمپان اِنت۔ اے کھولانی ورنایانی زوریں بیگواھی کسانیں ویلے نہ اِنت، بلکیں ھمک روچی دودے جوڑ بوتگ۔ دردیگیں گپ ایش اِنت کہ اے وتی آیزاناں چہ ناماں نہ بلکیں نمبراں یاد کن اَنت کہ اے کھول ءِ بیستمی زوریں بیگواھی اِنت۔ اے جاور تھنا آزار یا سزا نہ بلکیں یک مھکمیں آزاردھی ءُ ریاستی زوراکیاں پیش دار اَنت۔
آئی ءَ گوشتگ کہ ھسبیہ کمبرانی ءِ یکیں برات یکبرے پد ءَ زور بیگواہ کنگ بوت۔ اے کھول چہ ایشی پیسری زوریں بیگواھی ءِ میان ءَ داں پانزہ ماہ ءَ آزاردھی، نادرسی ءُ جنجالانی دیمپان بوتگ۔ نوں پد ءَ ھمے جنجالانی دیمپان کنگ بوتگ۔
سمی دین ءَ گوشتگ کہ ھسان کمبرانی چہ ایشی پیش زور بیگواہ کنگ بوتگ، بے بھتام ءَ داں پانزدہ ماہ ءَ بندیگ بوتگ ءُ پد ءَ یل کنگ بوتگ۔ آئی سر ءَ میارباری سرزد نہ بوتگ ءُ نوں ھم نہ بیت۔ اے وڑیں زوریں بیگواھیانی مول تھنا کھولانی آزار دیگ، ترسینگ ءُ مچی سزا ءِ دیمپان کنگ اِنت۔
