بلوچ نیشنل موومنٹ ءِ انسانی ھکانی ادارہ پانک ءَبلوچستان سرکار ءِ نیمگ ءَ وتگڑیں بلوچستان سینٹر آپ ایکسیلینس آن کاؤنٹرنگ وائلینٹ ایکسٹریمز رولز 2025 ءُ آئی بابت ءَ بندیگجاہ ءِ منّگ ایر جتگ ءُ گوشتگ کہ اے کانود پہ زوریں بیگواھی ءِ جیڑہ ءِ گیش ءُ گیوار کنگ ءَ جوڑ نہ بوتگ بلکیں زوریں بیگواھی ءَ یک نوکیں نامے ءِ رد ءَ کانودی بستارے دیگ ءِ جھد ءَ کنگ ءَ اَنت۔
آئی ءَ گوشتگ کہ ھمے ٹاپار جنگ بوگ ءَ اِنت چہ اے کانود ءَ زوریں بیگواھی ھلاس کنگ بوتگ، تچکیں دروگے ءُ اے گوں ھزارانی کچ ءَ بلوچ کھولاں ناانساپی یے کہ آ مرچی ھم پہ وتی آزیزانی آجوئی ءَ جھد کنگ ءَ اَنت۔ زوریں بیگواھی دروگے نہ اِنت بلکیں یک تچکیں راستی یے، ایش ھندی ءُ میان استمانی انسانی ھکانی گلاں منّ اتگ۔
پانک ءَ گوشتگ کہ ایشی گیش ءُ گیوار ھمیش اِنت کہ زوریں بیگواھی سرجم ءَ ھلاس کنگ بہ بیت، درسیں بیگواھیں مردم آمیدگس ءَ پیش کنگ بہ بنت ءُ ایشی زمہ وار کانود ءِ ھساب ءَ جست گرگ بہ بنت۔ بلوچستان ءَ دگہ بندیگجاہ درکار نہ اِنت بلکیں انساپ، راستی ءُ زور بیگواھیں مردمانی سلامتی واتری درکار اِنت۔
