مستونگ ءَ سی ٹی ڈی ءَ یک کاروائی یے ءَ پنچ سلاہ بندیں مردمانی کشگ ءِ ٹاپار جتگ۔
سی ٹی ڈی ءِ جارکش ءَ گوشتگ کہ مستونگ کاروائی ءَ کشگ بوتگیں مردم بلوچ لبریشن آرمی (بی ایل اے) ءِ باسک اَنت کہ دیم پہ دیمی میڑ ءَ جنگ بوتگ اَنت۔
آئی گوشتگ کہ سی ٹی ڈی ءَ ھال رستگ کہ سلاہ بندیں مردماں دشت ءَ شال ءُ سبی ءَ روکیں شھدگ بستگ ءُ شھری ءُ پوج ءِ کارمنداں نشانگ کنگ لوٹ اَنت۔ ھمے ھال ءِ پژدر ءَ کاروائی کرتگ۔ سلاہ بندیں مردماں سی ٹی ڈی ءِ کارمند دیستگ اَنت کہ آیاں تیرگواری کرتگ۔ پسھی تیرگواری ءَ پنچ سلاہ بند جنگ بوتگ ءُ آیانی آدگہ سنگت تتکگ اَنت کہ آیانی پٹ ءُ پول برجاہ اِنت۔
جارکش ءَ گوشتگ کہ چہ جنگ بوتگیں مردماں پنچ ایس ایم جی، ھپت دستی بمب ءُ سے موٹرسائیکل دستیگ کرتگ۔ جنگ بوتگیں مردمانی لاش نادراھجاہ ءَ برتگ اَنت۔
چوش کہ چہ ایشی ءَ پیش ھم سی ٹی ڈی ءَ دروگیں میڑانی ٹاپار ءَ زوربیگواھیں مردم کشتگ اَنت ءُ پد ءَ آ سلاہ بندیں گلانی باسک پدّر کرتگ اَنت۔ بلے مرچی کشگ بوتگیں مردمانی پجار سی ٹی ڈی ءَ انگت نہ گوشتگ اَنت۔ انچوش گمان بیت کہ مرچی ھم کشگ بوتگیں مردم زوربیگواھیں مردم اَنت۔
