بلوچ آجوئی لوٹوکیں سروک اکتر ندیم بلوچ ءَ سائیں جی ایم سید ءِ ودی بوگ ءِ سد ءُ بیست ءُ دومی سالروچ ءِ درگت ءَ گوشتگ کہ سائیں جی ایم سید ءِ لیکھی کارکن ءُ سنگت اے جھد ءِ ھما رژنائیں چراگ اَنت کہ آیاں ھمک دور ءَ زوراکی، کید ءُ بند، ریاستی زوراکیاں ابید سند ءِ راجی آجوئی ءِ لیکہ زندگ داشتگ۔آیانی ھمے تمردی، لیکھی ھمگرنچی ءُ دیمونی پہ سند ءِ سیاسی گوستانک ءَ یک پھر ءُ شانیں درے ءُ پہ آیوکیں پدریچ ءَ مادنیں کشکے۔
آئی ءَ گوشتگ کہ مرچی ئیں ناگیگیں دور ءَ جی ایم سید ءِ کارکنانی سر ءَ اے گوستانکی زمہ واری یے کہ آ وتی لڑانی میان ءَ اتھاد، گل ءُ لیکھی ھمگرنچی ءَ گیشتر مھکم بہ کن اَنت۔ چہ وت ماں وتیں ایرادگریاں ابید راجی مول ءَ دیم ءَ بیار اَنت ءُ سندھو دیش ءِ لیکہ ءَ مھلوک ءِ تہ ءَ شریں وڑے ءَ سر بہ کن اَنت۔
بلوچ سروک ءَ گوشتگ کہ سائیں جی ایم سید ءِ لیکہ مارا ھمے گوش ایت کہ راج چہ زور ءَ نہ بلکیں زانشت، سیاسی بودناکی ءُ یکشلیں جھد ءَ آجوئی ءَ گر اَنت۔ آئی کارکن چہ ھما گھگیری سیاست ءُ یکشلیں جھد ءَ سند ءِ ھمک بھرگ ءَ اے زرمبشت ءَ ھوار بہ کن اَنت ءُ راجی زانشت ءَ گوں یک مھکمیں توانے ءَ مٹ بہ کن اَنت۔
اکتر ندیم بلوچ ءَ گوشتگ کہ یک مھکمیں گھگیری زرمبشتے سندی ءِ آجوئی، راجی شرپ ءُ وتواکی ءِ مانزمان بیت۔ جی ایم سید ءِ لیکھی کارکن ھم ھمے جھد ءِ ھکی ئیں وارس اَنت۔
