شال ءَ وائس پار بلوچ مسنگ پرسن ( وی بی ایم پی ) ءِ زھرشانی گدان ءَ شال پریس کلب ءِ دیم ءَ 6051 روچ سرجم بوتگ کہ برجاہ انت۔ گدان ءَ وی بی ایم پی ءِ چیرمین نسراللہ بلوچ ساڑی بوتگ۔
مرچی جتائیں بھرگاں سیادی داروکیں مردم گدان ءَ اتکگ اَنت ءُ گوں زور بیگواھیں مردمانی کھولاں ھمدردی درشان کرتگ۔ آیاں بلوچستان ءَ زوریں بیگواھیانی سر ءَ بژن درشان کرتگ، زوربیگواھیں زالبولاں ھوار درستیں زور بیگواھیں مردمانی آجوئی ءِ لوٹ کرتگ۔
وی بی ایم پی ءِ چیرمین نسراللہ بلوچ ءَ کھول دلجمی داتگ اَنت کہ گل زوربیگواھیانی بگیری ءَ ھمک جاہ ءَ توار چست کنت ءُ انسانی ھکانی لگتمالی ءُ درکانودی کوشانی بگیری ءَ وتی پر ایمن ءُ آئینی جھد ءَ برجاہ دار ایت۔
نسر اللہ بلوچ ءَ گوشتگ کہ چہ گل ءِ نیمگ ءَ نسرینہ بلوچ ءِ کیس سرکار ءُ پہ بیگواھیں مردماں جوڑ بوتگیں کمیشن ءَ داتگ۔
آئی ءَ گوں سرکار ءُ کمیشن ءَ لوٹ کرتگ کہ پہ نسرینہ بلوچ ءِ آجوئی ءَ دلجمی بہ دے اَنت اگاں آئی سر ءَ چونیں ھم بھتامے ھست گڑا دیم ءَ آرگ ءُ آمیدگس ءَ پیش کنگ بہ بیت ءُ آئی ءَ پہ وتی بے میار پیش کنگ ءَ کانودی ھک دیگ بہ بیت۔
