ڈیرہ بگٹی ءِ ھند سوئی ءَ چہ گیس ءِ بندی ءِ سوب ءَ ھوٹل واھندانی نیمگ ءَ دو روچ اِنت کہ زھرشانی برجاہ اِنت۔ زھرشانی کنوکیں مردماں پلے کارڈ ھم دستاں اِنت کہ آیانی سر ءَ جتائیں اوگام نبشتہ اِنت۔
زھرشانی کنوکیں مردمانی گوشگ اِنت کہ مئے گیس ءِ لائن بند کنگ بوتگ کہ چہ ایشی ءَ مئے ھوٹل بند اَنت ءُ ھندی مردم پہ وردنے ءِ جوڑ کنگ ءَ جنجال اَنت۔ مئے زھرشانی ءَ دو روچ سرجم بیتگ انگت ءَ چہ انتزامیہ ءِ نیمگ ءَ کس پہ مئے لوٹانی گوش دارگ ءَ نہ یتکگ۔
آیانی گوشگ اِنت کہ ما پہ وتی بنکی ھکاں زھرشانی کنگ ءَ ایں چہ سرکار ءِ نیمگ ءَ پہ مئے لوٹانی منگ ءَ ابید پہ زھرشانی ءِ ھلاس کنگ ءَ بیڑ برگ ءُ لٹ دیگ ءِ بیھار دیگ بوگ ءَ اِنت۔
آیانی گوشگ اِنت کہ چہ اے جاہ ءَ پنچ کلومیٹر ءِ دوری ءَ گیس در آھگ ءُ داں اسلام آباد ءَ روگ ءَ اِنت بلے ما ھندی مردم چہ گیس ءَ زبھر ایں۔ اے مئے سوئی ءِ مردمانی گون ءَ مزنیں زوراکی یے ما ایشی ھچ وڑ ءَ نہ من ایں۔
