بلوچ اسٹوڈنٹس کونسل پنجاب ءَ داؤد جان بلوچ ءُ رمیز بلوچ ءِ زوریں بیگواھی ءُ بلوچستان ءَ برجاھیں انسانی ھکانی لگتمالی ءِ سر ءَ بژن درشان کرتگ ءُ آیانی آجوئی ءِ لوٹ کرتگ۔
جارکش ءَ گوشتگ کہ ریاست ءَ بلوچستان ءُ ڈیھ ءِ آدگہ کنڈاں جاور انچوش نگیگ کرتگ اَنت کہ بلوچ نودربر ھچ جاہ ءَ پھریز نہ اَنت۔ بلوچ نودربراں پہ وانگ ءِ سزا ءَ زوربیگواہ کنگ ءُ ترسینگ ءَ اَنت کہ اے یک بژنی کارے ما ایش ءَ ھچ وڑ ءَ نہ من ایں۔
آئی وتی درشان ءَ گوشتگ کہ داؤد جان بلوچ یونیورسٹی آپ انجینئرنگ اینڈ ٹیکنالوجی (یو ای ٹی ) لاھور ءَ سول انجینیئرنگ ءِ نودربرے کہ 2 نومبر 2025 ءِ سھب ءِ ادار پنچ ءَ آ گوں ناکوزتک ءُ براس ءَ ھوار کھول ءِ دیم ءَ آوار جنگ ءُ بیگواہ کنگ بوتگ داں روچ ءِ مرچی کھول ءَ آئی بابت ءَ ھچ گوشگ نہ بوتگ کہ آ چون ءُ کج ءَ انت۔
جارکش ءَ گوشتگ کہ ھمے وڑ ءَ رمیز بلوچ ء نواب کہ آ اردو لبزانک ءَ ایم پل ءِ نودربرے ءُ بی ایس سی ملتان ءِ گوستگیں چیئرمین اِنت۔ 12 جنوری 2026 ءَ چہ شال ءَ سی ٹی ڈی ءِ کارمنداں آوار جتگ ءُ آئی زوریں بیگواھی ءَ پد کھول ءَ آئی بابت ءَ ھچ وڑیں ھال دیگ نہ بوتگ۔
آئی گوشتگ کہ زوریں بیگواھی ءِ درچ نوں چہ بلوچستان ءَ ڈن ھم ڈیھ ءِ آدگہ جاھاں داں بلوچ نودربراں سر اِنت۔ آئی گوشتگ کہ اے یک مھکمیں پالیسی یے کہ آئی مول بلوچستان ءَ بلوچ راج ءِ وانندگیں بھرگ ءِ نشانگ کنگ ءُ آیانی باندات ءِ تباہ کنگ اِنت۔
جارکش ءَ گوشتگ کہ پاکستان ءِ وانگی ادارھانی تہ ءَ بلوچ نودربر ترسینگ بوگ ءُ نشان کنگ بوگ ءَ اَنت۔ چہ ایشی سوب ءَ بازیں نودربر وتی وانگ ءِ یل کنگ ءَ لاچار اَنت۔ اے جاور نہ تھنا انسان ءِ جند ءَ تاوان دے اَنت بلکیں پہ بلوچ راج ءِ وانگی ءُ چاگردی دیمروئی ءَ بلاھیں تُرسے۔
بلوچ اسٹوڈنٹس کونسل پنجاب ءَ اے ویل انسانی ھکانی بگیری لیک اتگ ءُ لوٹ کرتگ کہ رمیز بلوچ ، داؤد بلوچ ءَ ھوار درستیں زوربیگواھیں نودربر زوت آجو کنگ بہ بنت ۔گل ءَ گوں انسانی ھکانی ءُ الم دوستیں ادارھاں لوٹ کرتگ کہ آ اے ویل ءِ پٹ ءُ پول ءَ بہ کن اَنت ءُ کھولاں چہ اے جنجالاں بہ رکّین اَنت۔
