لندن ءَ لیبر پارٹی ءِ پارلیمنٹ ءِ باسک جان میکڈونل ءَ برتانیہ پارلیمنٹ ءَ بلوچستان ءَ انسانی ھکانی لگتمالیانی بگیری ءُ برتانیہ ءِ سلاہ ءُ آدگہ سامانانی کارمرز بوگ ءِ سر ءَ نبشتھی جست کرتگ۔
جان میکڈول ءَ گوں باپاری وزیر ءَ جست کرتگ کہ برتانیہ سرکار پاکستان ءَ پوجی ساز ءُ سامان ءُ آدگہ کارمرز بیوکیں سامانانی لائسن ءَ دیگ ءَ اِنت کہ آ بلوچستان ءَ ڈرون آپریشن یا تھی پھازداریں کاروائیاں کارمرز کنگ بہ بنت۔
چہ سرکار ءِ نیمگ ءَ پسو دیگ بوتگ ءُ باپاری ادارہ ءِ وزیر کرس برائنٹ ءَ گوشتگ کہ برتانیہ بلوچستان ءَ ھوار پاکستان ءِ انسانی ھکانی لگتمالیانی رپورٹ ءِ سر ءَ بژنیگ اِنت۔
آئی ءَ گوشتگ کہ شھری ءُ سیاسی ھکانی پد جنگ پاکستان ءِ گون ءَ برتانیہ ءِ سپارتی ھمگرنچی ءِ یک بنیادی بھرے۔
کرس برائنٹ ءَ گوشتگ کہ برتانیہ سرکار ءَ گوں پاکستانی وزیراں انسانی ھکانی لگتمالی ءِ ترس ءِ گپ جتگ۔
آئی ءَ گوشتگ کہ برتانیہ پاکستان سرکار ءَ زور دنت کہ آ وتی آئین ءُ انسانی ھکانی میان استمانی لوٹانی رد ءَ درسیں مردمانی ھکانی مانزمانی ءَ بہ دنت۔
آئی ءَ سلاھانی رد کارمرز بوگ ءِ سر ءَ گوشتگ کہ پوجی ءُ آدگہ سامانی درسیں لائسنانی بابت ءَ برتانیہ چار ایت۔ اگاں ترس ودی بوت گڑا ھلاس کنگ یا ماٹو کنگ بنت۔
آئی ءَ دیمتر ءَ گوشتگ کہ انوگیں کچ ءُ کساسانی رد ءَ برتانیہ ءَ پاکستان ءِ ھمے لائسنانی دیگ نہ منّ اتگ کہ اود ءَ اے سامانی رد کارمرز بوگ ءِ ترس بوتگ ءُ ھمے گمان کنگ بوتگ کہ اے سامان پہ تھی زوراکی یا انسانی ھکانی بگیری ءَ کارمرز بنت۔
https://questions-statements.parliament.uk/written-questions/detail/2025-11-26/94632
برتانیہ پارلیمنٹ ءِ اے جست بلوچ نیشنل موومنٹ ءِ دری کارانی تک ءِ سپارتکاری ءِ جھدانی بھر اِنت کہ آ مدام میان استمانی تک ءَ بلوچستان ءَ انسانی ھکانی بگیریانی سر ءَ سرپدی مھم برجم دارگ ءَ اَنت۔ بی این ایم مدام بلوچستان ءِ آجوئی ءُ بلوچ راج ءِ بگیری ءَ زوراکیانی جست گرگ ءِ لوٹ ءَ کنگ ءَ اِنت۔
چوش کہ بلوچ نیشنل موومنٹ ءِ سنگت 4 دسمبر 2025 ءَ یورپی پارلیمنٹ ءَ شتگ اِت اَنت۔ آیاں گوں یورپی پارلیمنٹ ءِ باسکاں پاکستان ءِ جی ایس پی باپاری ءِ ماٹو کنگ ءِ لوٹ کرتگ اَت۔
