بلوچ اسٹوڈنٹس ایکشن کمیٹی ءِ جارکش ءَ گوشتگ کہ گل ءِ نیمگ ءَ سرجمیں بلوچستان ءَ بلوچستان کتاب کاروان ءِ نام ءَ کتاب میڑھانی مھم برجاہ اِنت۔ اے درگت ءَ شال انتزامیہ ءِ نیمگ ءَ نودربرانی یکشل ءَ ترسینگ ءُ اسٹال ءَ پہ رپورٹ کنگ ءَ اتکگیں اھوالکار سمی بلوچ ءِ درکانودی دزگیری جمھوری ءُ آجوئی ءِ گپ ءِ سر ءَ ارشے ءُ ایشی ءَ پژنیگ ایں۔
آئی ءَ گوشتگ کہ چہ ایشی پیش شال ءَ جتگیں دگہ یک کتاب کاروانے ءِ سر ءَ شال پولیس ءَ بیڑ برتگ ءُ نودربر تریسنتگ اَنت ءُ تانہ ءَ برتگ ءُ بند کرتگ اَنت، کتاب ھم برتگ اَنت ءُ پد ءَ نودربر یل داتگ اَنت۔ بلے مرچی پد ءَ گل ءِ نیمگ ءَ جتگیں کتاب میڑہ ءِ سر ءَ پولیس ءَ بیڑ برتگ ءُ نودربر ترسینتگ اَنت ءُ پہ آیانی اسٹال ءِ ھلاس کنگ ءَ بیھار داتگ، وھدے کہ اود ءَ ورنائیں اھوالکار سمی بلوچ ءَ پولیس ءِ اے درکانودی کارپدانی بگیری ءَ گھگیری کرتگ ءُ کتاب میڑہ کوریج داتگ گڑا پولیس ءَ آ پہ زور دزگیر کرتگ ءُ درکانودی بندیگ کرتگ کہ آ سکا بژنی کار ءُ اھوالکاری ءِ آجوئی ءِ تچک ءَ بگیری اِنت کہ ما ایشی گوں ترندیں دانکاں ایر جن ایں۔
جارکش ءَ گوشتگ کہ گل گوں سرکار ءُ بنجاھی واکداراں لوٹ کنت کہ اھوالکار سمی بلوچ زوت یل کنگ بہ بیت ءُ بلوچستان ءَ ورنایانی چہ کتاب کاروان ءَ دور دارگ ءِ اے پندلاں زوت بند بہ کنت ءُ پہ زانشتی ءُ دودمانی سرگرمیاں جوانیں چاگردے بہ ٹھین ایت۔ اگاں وانگ دژمنی ءِ درچ بند نہ بوت گڑا ما پر ایمنیں زھرشانی کن ایں، چی ءَ کہ کتاب ءُ ند ءِ سر ءَ پابندی جنگ پہ چونیں ھم شرپمندیں چاگردے ءَ جیڑگی گپے۔
