بلوچ لبریشن آرمی ( بی ایل اے ) ءِ جارکش جیئند بلوچ ءَ بی ایل اے ءِ پاری ئیں کارانی رپورٹ شنگ کرتگ ءُ گوشتگ کہ بی ایل اے ءِ سرمچاراں 2025 ءَ دژمن جتائیں میڑاں پروش داتگ۔ بی ایل اے ءِ گھگیری کنوکاں زورگریں پاکستانی پوج، آئی شریدار، پوجی شوربندی ءُ کمکارانی بگیری ءَ وتی کاروائی برجاہ داشتگ اَنت۔ پہ بلوچ راجی آجوئی ءَ بی ایل اے ءِ سرمچاراں گوں ترندی ءَ زورگریں پاکستانی پوج ءُ آئی شریدار آپریشناں نشانگ کرتگ اَنت، چہ سوبمندیں چیریں کاروائیانی رد ءَ راج ءِ پارست ءَ وتی زور پیش داشتگ۔
آئی ءَ گوشتگ کہ بی ایل اے ءِ سرمچاراں اے سال ءَ سرجم ءَ دژمن ءِ سر ءَ 521 ارش کرتگ۔ سرمچاراں اے ارشاں 1060 ءَ گیش دژمنیں پوجی کارمند کشتگ ءُ جتائیں ارشانی آسر ءَ 556 ءَ گیش دژمنیں پوجی ءُ کمکار ٹپی کرتگ۔ پہ زورگریں پوج ءِ چاریگی ءُ کمکاری ءَ ھواریں 75 کمکار کشتگ۔ آیانی تہ ءَ بیڑ برگ ءُ دزگیر کرتگین ءُ چہ میارباریانی منّگ ءَ پد بلوچ آمیدگس ءَ سزا داتگیں کمکار ھم ھوار اِنت۔
جارکش ءَ گوشتگ کہ بی ایل اے ءِ سرمچاراں اے سال ءَ پانزدہ آپریشن ھم کرتگ کہ اے آپریشناں بی ایل اے ءِ بھرگ مجید برگیڈ ءِ چار، پتے اسکواڈ ءِ شش ءُ اسپیشل ٹیکٹیکل آپریشن اسکواڈ ءِ پنچ کاروائی ھوار اِنت۔ چہ ایشاں زورگریں پوج ءُ آئی شریداراں باز جانی ءُ مالی تاوان بوتگ۔ اے درسیں کاروائیاں بی ایل اے ءِ چیریں بھرگ زراب ءَ جوانیں کرد پیلو کرتگ۔
آئی ءَ گوشتگ کہ اے سال ءَ جتائیں وڑاں 212 تراکاں دژمن نشانگ کرتگ، ایشانی تہ ءَ یکسد ءُ دوازدہ آئی ای ڈی ھم ھوار اِنت۔ اے سال ءَ سرمچاراں دژمنیں پوج سکا مالی تاوان داتگ۔ ارشانی آسر ءَ دژمنیں پوج ءِ 215 گاڑی ءُ موٹر سائیکل، 35 کواڈ کاپٹر ءُ سرویلنس ڈرون، ھپت کمونیکیشن ءُ سرویلنس ٹاور، سے ریلوے ٹریک تباہ کرتگ۔
جارکش ءَ گوشتگ کہ سرمچاراں زورگریں پوج ءُ آئی کمکارانی 208 جتائیں سلاہ پل اِتگ اَنت۔ 48 جاہ ءَ زورگریں پوج ءِ بنجل، پولیس ءُ لیویز تانہ ءُ چوکی دستیگ کرتگ، چہ آیاں زھری، منگچر، سوراب، مستونگ ءُ پَنجگُور شھر ھم ھوار اِنت۔ سرمچاراں سرجمیں بلوچستان ءَ 42 جاہ ءَ گیش شھدگ بستگ ءُ پوج ءِ کارمند ءُ کمکار 566 دزگیر کرتگ۔
آئی ءَ گوشتگ کی بی ایل اے مجید برگیڈ ءَ چار آپریشن کرتگ۔ آیانی تہ ءَ دہ پدائیاں بھر زرتگ۔ مجید برگیڈ ءِ پدائی آپریشن ءِ درہِ بولان ءِ دومی بھر ءِ رد ءَ بولان ءَ زورگریں پاکستانی پوج ءِ بروکیں جاپر ایکسپریس ریل داشتگ آئی سواریں درسیں کارمند دزگیر کرتگ اَنت، آپریشن ءِ رد ءَ نوشکی ءَ زورگریں پوج ءِ کارمندانی بروکیں بسانی کاروان ھم نشانگ کرتگ۔ مجید برگیڈ ءِ سرمچاراں تربت ءُ دشت ءَ زورگریں پوج ءِ بسانی کاروان نشانگ کرتگ ءُ تر ءُ گرد داشتگ۔
جارکش ءَ گوشتگ کہ بی ایل اے ءِ بھرگ پتے اسکواڈ ءُ اسپیشل ٹیکٹیکل آپریشنز اسکواڈ ءَ یازدہ آپریشن کرتگ۔ اے بھرگاں آپریشن درہِ بولان ءَ جوانیں کرد پیلو کنگ ءَ ھوار زھری ءُ منگوچر شھر ءِ دستیگ کنگ، زورگریں پوج نوشکی، کلات ءُ شال ءَ ترندیں ارشاں نشانگ کرتگ کہ دژمن ءِ میجر رینک ءِ سروگان ھم کشتگ اَنت۔
آئی ءَ گوشتگ کہ 2025 ءَ بی ایل اے ءِ 72 نہ ترسیں سرمچار شھید بوتگ۔ آیانی تہ ءَ بی ایل اے مجید برگیڈ ءِ 11 پدائی ھم ھوار اِنت کہ آیاں زورگریں پوج ترندیں ارشاں نشانگ کرتگ ءُ نمیران بوتگ اَنت۔ بی ایل اے دژمنیں پوج، آئی شریدار، شوربندی ءُ کمکاراں گوں ترندی ءَ داں ھما وھد ءَ نشانگ کنت دانکہ دژمن چہ بلوچستان ءَ سرجم ءَ درکپگ ءَ لاچار نہ بوتگ۔
