شال؛ پہ زوربیگواھیں مردمانی آجوئی ءَ شال پریس کلب ءِ دیم ءَ برجاھیں وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6041 سرجم بوتگ کہ گل ءِ چیرمین نسراللہ بلوچ ءِ ساڑی بوتگ۔ چہ جتائیں بھرگاں سیادی داروکیں مردم گدان ءَ آتکگ اَنت ءُ گوں زوربیگواھیں مردمانی کھولاں ھمدردی درشان کرتگ۔
چہ ھب چوکی ءَ زوربیگواھیں نسرینہ بلوچ ءِ کھول ھم زھرشانی گدان ءَ آتکگ ءُ زھرشانی ءَ نشتگ اَنت۔ آیاں گوشتگ کہ پاری 22 نومبر ءَ چہ ھب چوکی دارو ھوٹل ءَ ایپ سی، سی ٹی ڈی ءُ چیریں ادارھانی کارمنداں مئے چمانی دیم ءَ نسرینہ آوار جتگ ءُ بیگواہ کرتگ۔
آیاں گوشتگ کہ ما پہ انساپ ءِ لوٹگ ءَ نزیکیں پولیس تانہ ءَ شتگ ایں بلے پولیس ءَ مئے ایپ آئی آر نبشتہ نہ کرتگ ءُ نہ کہ نسرینہ ءِ بابت ءَ مارا سرپدی دیگ ءَ اِنت کہ چہ ایشی سوب ءَ مئے کھول سسائی جنجالانی دیمپان اِنت۔
آیاں گوشتگ کہ مئے زھرشانی کنگ ءِ مول ھمیش اِنت کہ مئے توار ءَ گوش دارگ بہ بیت ءُ ڈیھ ءِ کانود ءِ رد ءَ مارا انساپ دیگ ءَ وتی کرد ءَ پیلو بہ کن اَنت۔ ما گوں بلوچ راج ءَ ھوار درسیں بھرگاں سیادی داروکیں مردماں لوٹ کن ایں کہ آ نسرینہ بلوچ ءَ ھوار درسیں زوربیگواھیں مردمانی بیگواھی ءِ بگیری ءَ توار چست بہ کن اَنت۔
وی بی ایم پی ءِ چیرمین نسراللہ بلوچ ءَ گوشتگ کہ نسرینہ بلوچ ءَ ھوار آدگہ بلوچ جنکانی زوریں بیگواھی ءُ آیاں دیم ءَ نیارگ شھریانی بنکی ھکانی لگتمالی اِنت کہ ما ایشی ءَ ایر جن ایں ءُ گوں سرکار ءَ لوٹ کن ایں کہ آ بلوچ جنکانی پہ سلامتی آجوئی ءَ وتی کرد ءَ پیلو بہ کنت۔
