بلوچ نیشنل موومنٹ ءِ انسانی ھکانی ادارہ پانک ءَ وتی شنگ کرتگیں درشانے ءَ آواران ءِ ھند گیشکور ءِ جاہ منند ءُ وانگجاہ ءِ ٹیچر ایاز بلوچ ءِ درکانودی کوش گوں ترندیں دانکاں ایر جتگ۔
آئی ءَ گوشتگ کہ 16 اکتوبر 2025 ءَ ایاز بلوچ ء دوست مھمد گوں آئی ناکوزتک امداد بلوچ ءِ ھواری ءَ چہ گس ءَ پاکستانی پوج ءَ آوار جتگ ءُ بیگواہ کرتگ۔ چہ آیانی زوریں بیگواھی ءَ پد کھول ءَ جست کرتگ بلے چہ سرکار ءِ نیمگ ءَ ھچ وڑیں ھال نہ رستگ۔
پانک ءَ گوشتگ کہ 6 جنوری 2026 ءَ چہ آواران ءِ ھند نوندڑہ ءَ ایاز بلوچ ءِ تیرسپتگیں لاش دزکپتگ کہ آ بندیگجاہ ءَ درکانودی کشگ بوتگ۔ آئی ناکوزتک امداد بلوچ انگت بیگواہ اِنت۔
آئی ءَ گوشتگ کہ اے کوش بلوچستان ءَ استاد ءُ لس شھریانی بگیری ءَ نشانگ کنگ ءِ درچ ءِ بھر اِنت۔ ایاز بلوچ ءِ ناکو ھدا بکش آ ھم وانگجاہ ءِ ٹیچرے اَت 3 مارچ 2024 ءَ درکانودی کشگ بوتگ۔ آئی ژانگولیں لاش چہ ھزدار ءِ نادراہ ءَ دزکپتگ۔
آئی ءَ گوشتگ کہ پانک ایاز بلوچ ءِ زوریں بیگواھی ءُ پد ءَ کوش ءِ زمہ وار پاکستانی پوج ءَ لیک ایت۔ اے وڑیں گامگیج میان استمانی انسانی ھکانی کانود ءِ بگیری اِنت کہ ایشی تہ ءَ زندگی ءِ ھک، زوریں بیگواھی ءُ شھریانی پھازداری ھم ھوار اِنت۔
