اوگانستان سرکار ءِ جارکش زبی اللہ مجاھد ءَ وتی شنگ کرتگیں درشانے ءَ گوشتگ کہ پاکستانی پوج ءِ نیمگ ءَ انوگیں پریس کانپرنس ءِ میان ءَ اوگانستان ءِ سرکاری ءُ چاگردی بنیاد ءِ سر ءَ شرگداری چہ راستی ءَ دور اِنت ءُ یک زمہ واریں پوجی ادارھے ءِ لوٹانی بگیری اِنت۔
آئی ءَ گوشتگ کہ امارت اسلامی اوگانستان اے وڑیں گپاں رد کنت ءُ گوں پاکستان ءِ ادارھاں لوٹ کنت کہ آ اوگانستان ءِ بگیری ءَ بے بنیادیں پندلاں ابید وتی تھی جیڑھانی گیش ءُ گیوار کنگ ءَ دلگوش بہ دنت۔
زبی اللہ مجاھد ءِ گوشگ اِنت کہ اوگانستان یک وتواک ءُ مھکمیں ڈیھے، آئی ءَ یک مھکمیں پوجے ھست ءُ واکداریں سروک ھست کہ آ وتی سرجمیں سرڈگار ءِ سر ءَ بادشاھی کرت کنت۔
آئی ءَ گوشتگ کہ اوگانستان ءِ تھی جیڑھانی دزمانجنی ءُ بیھار ءَ اوگان مھلوک ھچ وڑ ءَ نہ منّ ایت۔
آئی ءَ گوشتگ کہ امارت اسلامیہ پاکستان ءِ ادارھاں زور دنت کہ دوئیں ڈیھانی نزیکی ءِ بابت ءَ بچار ءُ گوں زمہ واریں رویشت ءَ پیش ببو ءُ سنگینیں گپ بہ جن۔
