گوادر ءِ ھند جیونی ءَ دو روچ اِنت کہ پاکستانی پوج ءِ نیمگ ءَ زوراکی یکشل ءَ برجاہ اِنت، پاکستانی پوج ءَ دگہ دو مردم آوار جنگ ءَ پد بیگواہ کرتگ۔
زرمبش جھگیر ءِ رد ءَ بیگواھیں مردمانی نام اسراج بلوچ ء نوربکش ءُ شبیر بلوچ ء ابدل اِنت کہ دوئیں مردم پانوان ءِ جاہ منند اَنت۔ دوشی پاکستانی پوج ءَ چہ گساں آوار جتگ ءُ بیگواہ کرتگ اَنت۔
ھندی بنشون ءِ رد ءَ پاکستانی پوج ءَ جیونی ءِ میتگ پانوان ءَ پرندوشی زوراکی بندات کرتگ ءُ دو روچ اِنت کہ سرجمیں میتگ انگر کرتگ ءُ یکشل ءَ گساں پٹ ءُ پول کنگ ءَ اِنت ءُ درسیں میتگ ءِ مردمانی جست ءَ کنگ ءَ اِنت۔
چہ ایشاں پیش پرندوشی ھم پاکستانی پوج ءَ چہ ھمے میتگ ءَ سے مردم رزوان بلوچ ء ابدرشید، سمید بلوچ ء ابدل ھمید ءُ سبیر بلوچ آوار جنگ ءَ پد بیگواہ کرتگ اِت اَنت۔ دو روچ ءِ میان ءَ پوج ءَ چہ پانوان ءَ پنچ مردم آوار جتگ ءُ بیگواہ کرتگ۔
اے بابت ءَ مئے گیشیں جست ءُ پرس برجاہ اِنت۔
