بلوچ وومن پورم ءَ وتی شنگ کرتگیں درشانے ءَ بلوچستان ءَ بلوچ زالبولانی درکانودی دزگیری ءُ زوریں بیگواھی ءِ سر ءَ بژن درشان کرتگ ءُ گوشتگ کہ ریاست چہ وتی بے سوبین پالیسیانی چارگ ءَ ابید مچی سزا ءِ پارست ءَ بلوچ زالبولاں نشانگ کنگ ءَ اِنت۔ آئی نہ تھنا پاکستان ءِ آئین بلکیں میان استمانی انسانی ھکانی کول ءِ تچک ءَ بگیری اِنت۔
آئی ءَ گوشتگ کہ بلوچ زالبولانی نشانگ کنگ سرجمیں چاگردے ءِ مچی سزا دیگ زانگ بیت۔ بلوچ وومن پورم گوں درسیں سانمندیں کھولاں یکجھتی کنت ءُ ھمے لوٹ ءَ کنت کہ زور بیگواھیں زالبول زوت دیم ءَ آرگ ءُ اے درکانودی آوار جنی بند کنگ بہ بیت، ایشی زمہ وارانی بگیری ءَ پہ دلجمی پٹ ءُ پول کنگ بہ بیت ءُ کانود ءِ رد ءَ جست کنگ بہ بنت۔
آئی ءَ گوشتگ کہ پورم گوں بلوچ مھلوک، سیول سوسائٹی، رسانکدر ءُ میان استمانی ھکانی ادارھاں لوٹ کنت کہ آ گوں پر ایمنی ءَ آئین ءُ جمھوری پارست ءَ اے انسانی ھکانی لگتمالیانی بگیری ءَ توار چست بہ کن اَنت ءُ پہ بلوچ زالبولانی پھریزگ ءُ بنکی ھکاں وتی کرد ءَ پیلو بہ کن اَنت۔
آئی ءَ درشان ءِ گڈی ءَ گوشتگ کہ بے تواری زوراکیاں گیشتر کمک کنت، پہ انساپ، انسانی شرپ ءِ پھریزگ ءَ ھواری ءَ پر ایمنیں جھد وھد ءِ لوٹ اَنت۔
