بلوچ یکجھتی کمیٹی ءِ نیمگ ءَ پہ زالبولانی زوریں بیگواھی ءِ بابت ءَ پنچ روچی کمپینے ءِ برجم دارگ ءِ جار ءِ پد ءَ زور بیگواھیں بلوچ نودربر سروک شبیر بلوچ ءِ گھار ءُ انسانی ھکانی کارکن سیما بلوچ ءَ وتی شنگ کرتگیں تامربندے ءَ گوشتگ کہ بلوچانی زندگی ءَ ابید چہ رنجاں دگہ ھچ نیست، ھمک روچ مئے ورنا زور بیگواہ کنگ بوگ ءَ اَنت۔ بلوچستان ءَ زوریں بیگواھی ءِ درچ روچ پہ روچ ءَ تیز بوان اِنت۔ چہ سالانی سالانی سال مئے ورنا بیگواہ اَنت۔
آئی ءَ گوشتگ انچوش کہ شبیر بیگواہ اِنت آئی ھچ ھال نیست۔ چیئرمین زاھد، اسد، زاکرمجید ءُ ڈاکٹر دین مھمد اِنت کہ آیاں چنچو سال اِنت بیگواہ اَنت۔ ھمے ھساب ءَ بلوچستان ءَ ھزارانی کچ ءَ مئے ورنا بیگواہ اَنت کس نہ زانت کہ چون اَنت ءُ چونیں آزار اوپار کنگ ءَ اَنت۔
سیما بلوچ ءَ گوشتگ کہ گوست ءَ ما چار ایں گڑا زرینہ مری گوں وتی گونڈویں زھگ ءَ بیگواہ کنگ بوتگ۔ چہ آئی ءَ رند زالبول بیگواہ کنگ بوگ ءَ اَنت۔ ماہ جبین ءَ ھپت ماہ سرجم بوگ ءَ اِنت آئی ھچ وڑیں ھال نیست۔نسرینہ ءِ بیگواھی ءَ ماھے سرجم بوگ ءَ اِنت۔پرزانہ زھری، رھمیہ ءُ چہ ھب چوکی ءَ دگہ دو زالبول ھانی ءُ ھیر النسا اَنت کہ آیانی ھچ وڑیں ھال نیست ءُ آیانی سر ءَ وتگڑیں بھتام جنگ بوگ ءَ اِنت۔
آئی ءَ گوشتگ کہ بیا اِت ما ءُ شما اے زوراکیانی بگیری ءَ توار چست کن ایں۔ پہ مئے بیگواہ کنگ ءَ ریاست ءَ اے پالیسی آرتگ ءُ آ ھمے لوٹ ایت کہ مئے پجار ءَ گار بہ کنت۔ چہ ایشی ءَ پیش ماہ ءُ شما تپاک بہ ایں ءُ پہ وتی بیگواھیں برات گھارانی آجوئی ءَ توار چست کن ایں۔
سیما بلوچ ءَ گوشتگ کہ بی وائی سی پنچ روچی کمپینے برجم دارگ ءَ اِنت بیا اِت اے کمپین ءَ بھر بزور اِت ءُ وتی پرزا پیلو بہ کن اِت۔ آن لائن پٹیشن ءَ دز رند بدے اِت۔
