بلوچ وومن پورم ءِ نیمگ ءَ شھید بانک کریمہ بلوچ ءِ شھیدی ءِ پنچمی سالروچ ءِ درگت ءَ ماں شال ءَ مراگشے برجم دارگ بوتگ۔ مراگش دو بھرانی تہ ءَ بوتگ، اولی بھر ءَ راجی سوت ،ڈاکیومنٹری ، تران ءُ بلوچ وومن پورم ءِ اولی تاک “برمش” ءِ دیمدرائی بوتگ ءُ دومی بھر ءَ آرٹس ایگزیبیشن ءُ بُک سٹال جنگ بوتگ۔
مراگش چہ ماما کدیر ءُ آ دگہ نمیران بوتگیں بلوچ پُسگانی یات ءَ دو ساھت ءِ بے تواری ءَ پد بندات کنگ بوتگ۔
کریمہ: “بلوچستان ءِ شیرزال “ ٹائیٹل ءِ سر ءَ بلوچ وومن پورم ءِ نیمگ ءَ یک ڈاکومنٹری یے کریمہ ءِ سیاسی ءُ گھگیری کارانی سر ءَ جوڑ کنگ بوتگ ءُ مراگش ءَ پیش دارگ بوتگ۔
دیمترا بی ڈبلیو ایپ ءِ بنجاھی سروک ڈاکٹر شلی بلوچ ءِ تران بوتگ ،آئی ءَ تران کنان ءَ گُوشتگ کہ مروچی اے نگیگیں جاورانی تہ ءَ ادا نندوکیں مردمانی آھگ ءُ بانک ءِ یات ءَ برجم داشتگیں پروگرام ءَ بھر زورگ پہ ما یک شرپے، اے جاورانی تہ ءَ استان ءِ نیمگ ءَ پنچ یا شش مردمے یکجاہ بوگ ءِ سر ءَ پابندی اِنت بلے اے جاوراں مئے ءُ شمے اد ءَ آیگ ءُ مچ بوگ ءُ سیاسی مراگشے ءِ برجم دارگ تھنا بی ڈبلیو ایپ ءِ نا بلکیں بلوچ ءِ سوبمندی اِنت۔
آئی ءَ دیمترا گوشت کہ جھان ءِ تہ ءَ انسان ءِ آبادی بے کساس باز اِنت بلے ما تھنا چہ ھسابی مردماں آشنا ایں، اے ھما مردماں یک سرکلے ءَ چہ در اتکگ اَنت ءُ پہ یک ازیمیں مکسدے ءَ زندگی کتگ، مرچی ما اد ءَ مچ ایں ھما کردار ءُ ھما بلوچ کارست ءَ (کریمہ) ءَ یات کنگ ءَ ایں کہ آ چہ وتی زاتی سرکل ءَ در کپتگ ءُ بلوچستان ءِ باؤنڈریز ءُ بلوچ راج وتی مکسد ءِ جوڑ کتگ ءُ پہ ھما ازیمیں مکسد ءَ داں گُڈی ساہ ءَ آئی کمنٹمنٹ گوں بلوچ جھد ءَ مھکم اَت۔ ھمے مھکمیں کمنٹمنٹ ءِ برورد ءَ کریمہ چہ یک لس انسانے ءَ چہ در کپتگ ءُ ازیمیں کردارے ءِ واھند بوتگ۔
مراگش ءِ گڈی بھر ءَ آرٹس ایگزیبیشن ءُ بُک سٹال بوتگ اَنت، آرٹس ایگزیبشن ءِ تہ ءَ بلوچ آرٹسٹاں کریمہ ءَ ھوار ءُ بلوچستان ءِ جاور وتی کنوس ءِ تہ ءَ جاہ داتگ انت ءُ ڈسپلے کتگ اَنت۔
