کریمہ بلوچ ءِ ناکوزتک مھلب کمبر ءَ شھید بانک کریمہ ءِ پنچمی سالروچ ءِ درگت ءَ بی این ایم ءِ مراگش ءَ تران کرتگ ءُ گوشتگ کہ کریمہ ءَ پہ وتی راجی پجار ءَ جھد کرتگ ءُ زوربیگواھیں مردمانی آجوئی ءَ روانک کشتگ ءُ زھرشانی کرتگ۔ آئی بلوچ چکچینی ءِ بگیری ءَ توار چست کرتگ ءُ آئی پہ ھجے گپ ءِ دلجمی ءَ یکشل ءَ جھد کرتگ کہ چہ انساپ ءِ جھد بے ھال کنگ مہ بیت
آئی ءَ گوشتگ کہ آئی ءَ راجی جھد تھنا گوں وتبءَ ھمگرنچ نہ کرتگ بلکیں آئی وتی کش ءُ پھنات ءِ مردم سانمند کرتگ اَنت۔ مارا بھر زورگ ءِ سکین داتگ ءُ زرمبشت ءَ ھواریں جھد ءِ ارزیشت ءِ سرءَ زور داتگ۔ آئی جھد پہ بلوچ راج ءَ پرایمنیں زند ءُ وشھالیں بانداتے بوتگ۔
آئی گوشتگ کہ بانک وش بھتے اَت کہ آ یک باسمائیں سیاسی کھولے ءِ گسے ءَ ودی بوتگ۔ آئی دو ناکو واھد کمبر ءُ ڈاکٹر ھالد بلوچ راجی جھد ءَ ھوار بوتگ اَنت۔ دوئیں انچیں ھستی اَنت کہ آیاں وتی سرجمیں زند پہ راجی زرمبشت ءَ داتگ۔ بانک ءَ سیاسی زانشت چہ وتی گس ءَ دربرتگ۔ وھدے من آ دیستگ گڑا آئی تہ ءَ منی پت ءُ شھید ڈاکٹر ھالد ءِ جھد ءُ دیمونی گندگ بوتگ اَنت۔ بانک داں وتی گڈی ساہ ءَ راجی جھد ءَ ھوبناکی ءُ سرجم ءَ ھوار بوتگ۔
مھلب کمبر ءَ گوشتگ انچوش کہ بلوچستان ءَ آدگہ کھولانی پیم ءَ منی کھول ھم جنجالانی دیمپانی بوتگ۔ یک سیاسی گسے ءِ دروشم ءَ اود ءَ دو مردم جھد ءِ سروکی ءَ کنگ ءَ بوتگ۔ مئے گس پہ ریاست ءَ ترسے بوتگ۔ ریاستی پوج ءَ یکشل ءَ مئے گس ءَ بیڑ برتگ کھول ءِ مردم ترسینتگ ءُ مئے ڈگار دستیگ کرتگ پد ءَ ھم اے مئے وش بھتی اَت کہ بانک مئے گون ءَ یکجاہ اَت۔ آئی ساڑی بوگ پہ مئے کھول ءَ گرانیں ساھتاں یک مھکمیں توکلے اَت۔
