بلوچ راج دوستیں رھشون ءُ بلوچستان لبریشن پرنٹ ( بی ایل ایپ ) ءِ سروک ڈاکٹر اللہ نزر بلوچ ءَ وتی شنگ کرتگیں درشانے ءَ گوشتگ کہ سکا گوں درد ءُ رنج، لیکھی جاھے ءِ ھالیگ بوگ ءِ مارشت ءِ ھواری ءَ انسانی ھکانی نامداریں سروک، انسانیت ءِ شرپ ءِ نہ ترسیں پد جنوک ءُ ریاستی زوراکیانی بگیری ءَ یکشلیں گھگیری ءِ چیدگ ماما کدیر ءِبیرانی ءَ سکا دلپدرد بوت آں۔ آئی بیرانی تھنا یک مردمے ءِ روگ نہ اِنت بلکیں انسانی شرپ، چاگردی انساپ ءُسیاسی زانشت ءِ یک انچیں درے ءِ ھلاسی اِنت کہ آ داں دراجکشیں وھدے ءَ ریاستی زوراکیانی آماچیں راجءُ سانمندیں کھولانی زبان بوتگءُ توکل بکش اتگ ءُ رھشونی کرتگ۔
آئی ءَ گوشتگ کہ ماما کدیر چہ وتی زھگ جلیل ریکیءِ زوریں بیگواھی ءُ بندیگجاہ ءَ شھیدی ءِ رنج ءَ پرشگ ءَ ابید بلکیں چہ زور بیگواھیاں سانمندیں آدگہ کھولانی اوست جوڑ بوگ ءِ پیسلہ کرتگ ءُ داں شانزدہ سال ءَ گھگیری کرتگءُ داں گڈی دم ءَ وتی جھد برجاہ داشتگ۔
بلوچ رھشون ءَ گوشتگ کہ ماما کدیر بلوچستان ءِ ناگیگیں جاورانی تہ ءَ ریاستی زوراکی، زوریں بیگواھی، بلوچ چکچینی ءِ بگیری ءَ وتی زندگی ءِ شانزدہ سال پہ جھد ءَ داتگ۔ آ لھتیں ھما مردمانی تہ ءَ ھوار اِنت کہ آیاں انسانی ھکانی لگتمالیانی بگیری ءَ سیاسی جھد ءِیک ھواریں دروشمے ءِ دیگ ءَ جوانیں کرد پیلو کرتگ۔ آئی دراجکشیں روانکے کش اتگ ءُجھان ءَ را بلوچ راج ءِ سر ءَ بیوکیں ریاستی زوراکی ءُ لٹءُ پلانی بابت ءَ سرپد کرتگءُ ریاستی زوراکیانی بگیری ءَ مردم پہ گھگیری ءَ یکجاہ کرتگ اَنت۔
ڈاکٹر اللہ نزر بلوچ ءَ گوشتگ کہ ماما کدیر یک انچیں وھدے ءَ پہ انسانی ھکاں توار چست کرتگ کہ زوریں بیگواھی تیز بوتگ۔ آئی ءَ داں میان استمانی ادارھاں بلوچ راج ءِ توار ءِ سر کنگ ءِ جھد کرتگ ءُ ھمے سدکی داتگ کہ انسانی ھکانی جست داں یک دمگ یا راجے ءَ بندوک مہ بیت بلکیں یک میان ستمانی سیاسی جیڑھے، ایشی سر ءَ بے تواری زوراکی ءِ کمک کنگ اِنت۔
آئی ءَ گوشتگ کہ ماما کدیر ءِ جھد ءَ ھمے پیش داشتگ کہ ھکی ئیں وتن دوستی ءُ راج دوستی گوں نزوریاں اوشتگ اِنت۔ آئی لیکھی مڈی پہ آھوکیں پدریچ ءَ یک سیاسی بستارے دار ایت، آ گوں ماما کدیر ءِ نام ءَ ھمگرنچ اِنت۔
بلوچ رھشون ءَ گوشتگ کہ من گوں ماما کدیر ءِ کھول ءَ ھمدردی درشان کن آنءُ اے گرانیں گم ءَ شریدار آں۔پاکیں ھاوند آئی ءَ وتی باگیں بھشت ءَ جاگہ ہ دنت ءُ آئی کھولءَ اے گرانیں گم ءِ اوپار کنگ ءِ ھاٹیگ ءَ بہ دنت۔
