دہ روچ پیش چہ گوادر ء ھند دو بیست ءُ پنجاہ ءَ پاکستانی پوجءِ دست ءَ زور بیگواھیں ورنا نوروز بلوچ ءِ پت الی بکش بلوچ ءَ پہ وتی زھگ ءِ آجوئی ءَ لوٹ کرتگ ۔
آئی ءِ گوشگ اِنت ما پنجگور ءِ ھند کیلکور ءِ جاہ منند ایں منی زھگ نوروز بلوچ ءَ پاکستانی پوج ءَ دہ دسمبر 2025 ءَ چہ کلدان دو بیست ءُ پنجاہ ءَ آوار جتگ ءُ بیگواہ کرتگ۔
آئی ءَ گوشتگ کہ منی زھگ نوروز بلوچ موٹر سائیکل ءِ سر ءَ سیمسر ءَ مزدوری کنگ ءَ بوتگ کہ چہ راہ ءَ پوج ءَ آوار جتگ ءُ بیگواہ کرتگ۔ پد ءَ ھما اِنت کہ آئی بابت ءَ مارا ھچ وڑیں سرپدی دیگ ءَ نہ اَنت ما نزان ایں مئے زھگ چون ءُ کج ءَ اِنت۔
آئی ءَ گوشتگ کہ مئے زھگ گوں دگہ ھچ وڑیں درکانودی کاراں ھوار نہ بوتگ آئی مزدوری کرتگ ءُ وتی کھول والینتگ چہ آئی زوریں بیگواھی ءَ مئے سرجمیں کھول جنجالانی آماچ اِنت۔
الی بکش بلوچ ءَ گوں سرکار ءَ لوٹ کرتگ ءُ گوشتگ کہ منی زھگ نوروز بلوچ زوت آجو کنگ بہ بیت یا پہ آئی سلامتی ءِ بابت ءَ مارا سرپدی دیگ بہ بیت۔
