بلوچ اسٹوڈنٹس آرگنائزیشن آزاد ءِ بیست ءُ چارمی راجی بنجاھی لس مجلس گوستگیں کماش درپشان بلوچ ءِ سروکی ءَ برجم دارگ بوتگ۔ بنجاھی لس مجلس نمیرانیں کمبر چاکر بلوچ ءُ پنام "بلوچ جُنز ءَ یکشل ءَ اوشتوکیں گمنامیں کارستانی یات ءَ دسمبر ءِ ماہ ءَ سئے روچی دلجمیں مجلس ءَ پد سوبمندی ءَ گوں آسر کنگ بوتگ، زَرّین بلوچ بنجاھی سرکماش ءُ مھردار بلوچ کارگشاد گچین کنگ بوتگ اَنت۔
سئے روچی بنجاھی لس مجلس چہ نمیرانیں سرانی یات ءَ دو ساھت ءِ بے تواری ءَ بندات کنگ بوتگ، مجلس ءِ اولی بھر ءِ بنگپانی تہ ءَ کماش ءِ بنگیجی تران، دستور سازی، دو سالی بنجاھی ھال ،شرگِداری، گَل ءِ کار، ھندی ءُ میاں استمانی سیاسی جاور ءُ آوکیں گامگیج ءَ پد گچینکاری ءُ دومی بھر ءَ گوستگیں کماش ءِ گُڈی تران ءُ نوک گچین بوتگیں سرکماش ءِ تران ءِ بنگپ ھوار بوتگ اَنت کہ سوبمندی ءَ گوں آسر بوتگ۔
بنجاھی لس مجلس ءِ اولی روچ ءَ بنجاھی کماش ءَ گوں کانسلراں تران کرتگ، دستور سازی ءَ پد، کارگشاد ءِ دوسالی ھال دلجمی ءَ مجلس ءِ دیم ءَ پیش کنگ بوتگ اَنت۔ دومی روچ چہ شرگداری بھر ءَ بندات بوت۔
نگدی بھر ءَ سنگتاں باوست کرتگ کہ آشوبی ادارھانی تہ ءَ نگد ھما چیز اِنت کہ چرائی ءَ ما وتی گوست ءُ ھست ءَ ھمدپ کن ایں ءُ تاوان دیوکیں نزوریاں کش ایں، بلے نگد مدام پہ مچی نپاں کنگ بہ بیت بہ زاں پہ مچی ءُ راجی جنز ءِ نپانی پھریزگ ءَ نگد گوں ایمانداری ءُ ابید ریاہ ءُ روہ ءَ کنگی اِنت چی ءَ کہ اے نگد اِنت کہ مارا وتی مکسد ءَ چہ چپ روگ ءَ دار ایت ءُ یکشل ءَ گوں آشوبی رھبنداں ھمگام کنت۔ مارا نہ تھنا وتی ادارہ ءِ تہ ءَ نگدی رواج دیگی اِنت بلکیں راجی جنز ءِ تہ ءَ اے رواج برجاہ دارگی اِنت دانکہ ما ھمک پِڑ ءَ وتی ردیانی سر ءَ نگدی نگاھے داشت بہ کن ایں ءُ آیانی درجنگ ءُ نزوریانی کشگ ءَ پہ کردی گامگیج زورگ ءَ دل مہ جن ایں بلکیں گوں نیک نیتی ءَ آیاں توجیل بہ کن ایں۔ اے بی ایس او ءِ رواج بوتگ کہ آ چہ نگد ءَ بیھ نہ تتکگ بلکیں پہ وشی آیانی دیمپانی کرتگ ءُ گوں سنگینی ءَ وتی نزوری ءُ کوتاھی کش اِتگ اَنت پرچا کہ ما سرپد بہ ایں ابید نگد ءَ مئے ھمک آشوبی کار گوں بے رھبندی ءَ جنز ایت، چیزے کہ بے رھبند ءَ جنز ایت ءُ چِک ءُ تان نہ بوت گڑا آ وتی منزل ءُ مکسد ءَ گِپت نہ کنت۔
گل ءِ کار بنگپ کہ آئی ءِ تہ ءَ بلوچ جنز ءِ ھستیں لوٹ ءُ گزرانی رد ءَ نوکیں پالیسی ءُ شوربندیانی سر ءَ باوست کنگ بوتگ، جتائیں سرھال ءُ پالیسیانی سر ءَ تران کنگ ءَ پد اے بنگپ ءِ آسری ءَ پد دیوان ءِ دومی روچ آسر کنگ بوتگ۔ سیمی روچ ءَ ھندی ءُ میاں استمانی سیاسی جاور ءُ آوکیں گامگیج ءِ بنگپ جنزینگ بوتگ۔ آؤکیں گامگیج ءِ بنگپ ءِ تہ ءَ اولی بھر ءَ پہ دو سالی کاراں پالیسی ٹھینگ بوتگ ءُ نوکیں پیسلہ زورگ ءَ پد دومی بھر ءِ تہ ءَ ھستیں جوڈشت ھلاس کنگ بوتگ درپشان بلوچ ءِ سروکی ءَ سے باسکی گچین کاری مجلس ٹھینگ بوتگ کہ اشی ءَ پد گچینکاری کنگ بوتگ۔
گچینکاری ءِ تہ ءَ امیتواراں جتائیں زمہ واریانی سر ءَ وتی کاگد جم کرتگ اَنت، چہ گچینکاری سوبمندی ءَ پد گچینکاری ءِ آسری ءِ جار پرینگ بوتگ ءُ دیوان ءِ دیم ءَ نوک گچین بوتگیں بنجاھی کابینہ ءُ بنجاھی پتر ءِ سنگتانی نام ایر کنگ بوتگ اَنت۔ نوک گچین بوتگیں زمہ وارانی تہ ءَ زرّین بلوچ سرکماش، مھردار بلوچ کارگشاد ءُ شولان بلوچ بنجاھی جارکش گچین کنگ بوتگ۔
مجلس ءِ اولی بھر ءِ بنگپانی آسری ءَ پد سوگندی بھر ءَ نوک گچین بوتگیں بنجاھی زمہ وار گوستگیں کماش درپشان بلوچ ءَ سوگند داتگ اَنت ءُ دیوان ءِ دومی بھر بندات کنگ بوتگ کہ آئی ءِ تہ ءَ بنجاھی گوستگیں کماش ءُ نوک گچین بوتگیں کماش ءَ مجلس ءِ دیم ءَ تران کرتگ۔
گوستگیں کماش درپشان بلوچ ءَ دیوان ءَ تران کنان ءَ گوشتگ کہ من نوک گچین بوتگیں بنجاھی زمہ واراں مراد باتی دیاں ءُ ھمے امیت داراں کہ نوک گچین بوتگیں سنگت اے راجی ادارہ ءَ گوست ءَ چہ گیش مھکم، لائک ءُ برجاہ دارگ ءَ وتی ھرچی ببا دیگ ءَ چک ءُ پد نہ بنت ءُ بلوچستان ءِ دوبر آجوئی ءَ وتی ھون ءُ ھیدانی پرواہ نہ دار اَنت۔ مرچی بی ایس او ءَ منی سپر ھلاس بوگ ءَ اِنت، اے پہ من یک گم ءُ جنجالے ءَ چہ کمتر نہ اِنت، اے پہ من سکیں گرانیں وھدے پرچا کہ من سر چِست کتگ گڑا بی ایس او اِنت کہ مارا انسانی ءُ سیاسی ھوالہ ءَ رودینتگ ءُ مزن ئِے کرتگ، مئے درسگاہ، مئے کھول ءُ مئے زِند درست بی ایس او بوتگ۔ بی ایس او مئے ھیال ءُ گمان ءَ چہ ھم گیش کرز ایت پرچا کہ اے ھمے ادارہ ءِ برورد اِنت کہ بلوچ راجی جُنز ءِ سیاسی روانی نہ پرشتگ ءُ ناکہ نزور بوتگ بلکیں ھمک جاور ءُ وھداں پہ آجوئی جنز ءَ اوشتوک بوتگ ءُ مھلوک ءُ ورنایانی نہ تھنا سیاسی ھیلکاری کتگ بلکیں آھانی رھشونی کنان ءَ پہ جنز ءَ سائنسی رد ءَ جھد ئِے کرتگ۔ اے دراجیں سپر چہ ھرپیمیں اڑانداں پُر بوتگ، بی ایس او ءِ جوڑ بوگ ءَ بِگر داں روچ ء مروچی بی ایس او اِستانی کریک ڈاون، بدواھانی بدیں کرد ءُ نپ پرستیں مردمانی اڑانداں ھوار ھمک وڑیں جیڑہ ءُ درآشوبی رویشت سگ اِتگ بلے اے بی ایس او ءِ رھشون ءُ کیڈرانی لیکھی مھکمی اِنت کہ آیاں ھمک ناگیگیں جاوراں بی ایس او ءِ آشوبی ءُ راجی بستار رکینتگ ءُگوں آجوئی ءِ مکسد ءَ ھمدپ کرتگ۔
نوک گچیں بوتگیں سرکماش زَرّین بلوچ ءَ تران کنان ءَ گوشتگ کہ نوک گچین بوتگیں زمہ واراں مراد باتی دیگ ءَ ھوار آیاں گوں ھمے پنت اِنت کہ آ زمہ واریاں تھنا اگدہ مہ زور اَنت بلکیں اشاں راجی ڈُبہ بہ پھم اَنت ءُ بلوچ راجی آجوئی ءِ جھد ءَ وتی گران کدریں کردارے ادا بہ کن اَنت، آ اے آوکیں سالاں چہ وتی تیوگیں ھمت ءُ مھنت ءَ بی ایس او ءَ پگری، جوڈشتی ءُ سائنسی تک ءَ گیش مھکم کنگ ءَ جھد بہ کن اَنت۔بی ایس او ءَ وتی سیاسی سپر ءِ تہ ءَ ھر پیمیں سکی ءُ جنجالی دِیستگ ءُ گوں دلیری ءَ آیانی دیمپانی کرتگ، اے راجدپتر ءِ تاکاں نکش اِنت کہ ھمک پیمیں ڈنی ءُ تھی گپچلانی دیمپانی ءَ پد ھم بی ایس او وتی راجی آجوئی جھد ءَ گوں آشوبی پِگر ءُ کرد ءَ دمانے ھم پشت کنز نہ بوتگ۔ مردماں بی ایس او مھکم کرتگ بلے جاھے جاھے ھمے مردماں ھم بی ایس او ءَ تاوان دیگ ءِ بے سوبیں کوشست کرتگ بلے ادارہ ءِ آشوبی لیکہ ءِ مھکمی ءَ اے تیوگیں جنجال نہ تھنا داشتگ اَنت بلکیں دیمروئی ھم کرتگ، بہ زاں بی ایس او ءَ وتی سیاسی سپر ءَ اے منارینتگ کہ مردم چہ ادارہ ءُ راجی جنز ءَ مستر ءُ بالاتر نہ اَنت۔
