بلوچ لبریشن آرمی (بی ایل اے) ءِ جارکش جیئند بلوچ ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں پنجگور ءُ زھری ءَ زورگریں پاکستانی پوج دو جتائیں اُرشاں نشانگ کرتگ۔ سرمچاراں زورگریں پوج ءِ سر ءَ گوں تراکناکیں شورہ ءُ آدگہ سلاھاں اُرش کرتگ کہ چہ ایشی ءَ پوج ءِ سیزدہ کارمند مرتگ ءُ ھپت ءَ گیش ٹپی بوتگ۔
آئی گوشتگ کہ بی ایل اے ءِ سرمچاراں چارشمبے ءِ روچ ءَ پنجگور ءِ ھند کاٹگری ءَ زورگریں پاکستانی پوج ءِ یک گاڑی یے گوں تراکناکیں شورھاں نشانگ کرتگ۔ تراک ءِ آسر ءَ زورگریں پوج ءِ چار کارمند مرتگ ءُ دگہ دو کارمند سکا ٹپی بوتگ۔ گاڑی باز تاوان بوتگ۔
آئی گوشتگ کہ بی ایل اے ءِ سرمچاراں شازدہ دسمبر ءَ ھزدار ءِ ھند زھری ءِ بلبل ءَ زورگریں پاکستانی پوج ءِ گاڑیانی کاروانے ءِ سر ءَ ترندیں اُرشے کرتگ۔ سرمچاراں زورگریں پوج ءِ یک گاڑی یے گوں تراکناکیں شورھاں نشانگ کنگ ءَ پد کاروان ءِ سر ءَ سنگر گپتگ ءُ اُرش کرتگ۔
آئی گوشتگ کہ سرمچاراں زورگریں پوج ھما وھد ءَ نشانگ کرتگ کہ آ بلبل ءُ کش ءُ پھناتاں لشکر کشی کنگ ءَ بوتگ۔ اے اُرش ءَ زورگریں پوج ءِ نھ کارمند مرتگ ءُ پنچ ءَ گیش ٹپی بوتگ۔ سرمچاراں زورگریں پوج ءِ گولا ،تراکناکیں شورہ ءُ بازیں کچے ءَ سلاہ گوں گاڑیاں ھوار دستیگ کرتگ اَنت۔
جارکش ءَ گوشتگ کہ پروش وارتگیں پوج زھری ءُ کش ءُ پھناتاں بے میاریں بلوچ مھلوک ءِ سر ءَ وتی زوراکی ءَ گیش کنگ ءَ اِنت۔ زورگریں پوج مھلوک ءَ پہ وتی پھازگ ءَ کارگرگ ءُ وتی پروش ءِ چیر دیگ ءِ بے سوبیں جھدے کنگ ءَ اِنت۔ گساں بیڑ برگ، مردمانی ترسینگ ءُ مچی سزا ءِ پالیسی ایشی پدریں منانک اِنت۔
آئی گوشتگ کہ بی ایل اے ءِ سرمچار ھر وھد ءَ پہ زورگریں پوج ءِ نشانگ کنگ ءَ تیاراَنت ءُ بلوچ مھلوک ءِ سر ءَ بیوکیں ھمک زوراکی ءِ ھساب گرگ بیت۔ زورگریں پوج اے بزانت کہ اے زور ءُ ریاستی آزار دھی بلوچ راجی گھگیری ءَ نزور کرت نہ کنت۔
جیئند بلوچ ءَ درشان ءِ گڈی ءَ دوئیں کاروائیانی زمہ واری من اِتگ۔
