بلوچ یکجھتی کمیٹی ( بی وائی سی ) ءَ وتی شنگ کرتگیں درشانے ءَ گوشتگ کہ شال ءِڈپٹی کمشنر ءَ زوراکی ءِ بستار ءَ شھریانی ھک ءِ سر ءَ پابندی جتگ۔
آئی ءَ گوشتگ کہ گوستگیں روچ ءَ شال ءَ انسانی ھکانی میان استانی روچ ءِ درگت ءَ یک دیوالے ءِ تہ ءَ یک مراگشے برجم دارگ بوتگ۔ اود ءَ نہ دگ بند کنگ بوتگ ءُ نہ دگہ ریاستی کارے ءِ دیم ءَ اڑاند ودی کنگ بوتگ۔ چہ ایشی ءَ ابید پہ مراگش ءَ بھر زورگ ءِ شک ءَ یکیں کھول ءِ چار مردم دوشی سریاب تانہ ءَ لوٹائینگ ءَ پد زور بیگواہ کنگ بوتگ۔
آئی ءَ گوشتگ کہ مرچی سھب ءَ پہ اے مردمانی آجوئی ءَ آمیدگس ءَ شتگ اَنت کیس یاداشت کرتگ کہ گڑا آ مردمانی پیش کنگءَ ابید جج ماٹو کنگ بوتگ ءُ آ چہ ڈپٹی کمشنر ءِ کارگس ءَ تھری ایم پی او ءِ پارست ءَ دزگیر کنگ بوتگ اَنت۔ اے بابت ءَ دگہ کانودی منانک ھم پیش کنگ نہ بوتگ۔ اے جاور ھمے چیز ءَ پدر کنت کہ بلوچستان ءَ یک بے جاریں پوجی مارشالا یے جنگ بوتگ۔
آئیءَ گوشتگ کہ انسانی ھکانی میان استمانی روچ ءِ درگت ءَ پروگرام وت یک بنیادی انسانی ءُ کانودی ھکے، بلے تھنا پہ ھمے بنیاد ءَ یکیں کھول ءِ چار مردم ءِ زوریں بیگواھی ءُ پد ءَ ابید کانودی منانک ءَ تھری ایم پی او ءِ رد ءَ بندیگ کنگ ھمے گپ ءَ پیش دار ایت کہ پاکستان ریاست بلوچستان ءَ یک کالونی یے ءِ وڑ ءَ دارگ ءَ اَنت۔
آئی ءَ گوشتگ کہ بی وائی سی گوں میان استمانی انسانی ھکانی ادارھاں لوٹ کنت کہ آ ریاست ءِ اے زوراکیانی بگیری ءَ گامگیج بزور اَنت۔ اے وھد ءَ بے تواری زوراکیانی کمک زانگ بیت۔
