انسانی ھکانی میان استمانی روچ ءِ درگت ءَ ایچ آر سی پی تربت ءِ نیمگ ءَ دیوانے برجم دارگ بوتگ۔ اے دیوان ءَ جتائیں بھرگاں سیادی داروکیں مردماں بازیں کچے ءَ بھر زرتگ۔
آیاں تران کرتگ ءُ گوشتگ کہ اے روچ ءِ دومی جھانی مزن جنگ ءَ پد پہ بنکی انسانی ھکاں دارگ ءَ چہ میان استمان ءِ تک ءِ نیمگ ءَ جار پرینگ بوتگ۔ انسانی ھکانی میانی منشور10 دسمبر 1948 ءَ منگ بوتگ. چہ ایشی ءَپد سرجمیں جھان ءِ ریاستی سر ءَ زمہ واری دیگ بوتگ۔
آیاں گوشتگ کہ دیمروئی یا انساپ ھما وھد ءَ کنگ بیت کہ ریاست وتی شھریانی بنکی ھکانی شرپ ءَ بہ کن اَنت۔ پاکستان ءَ شھریانی ھک یکشل ءَ لگتمال بوگ ءَ اَنت بلے بلوچستان ءَ جاور سکا ناگیگ اَنت۔ اد ءَ پہ مردمانی زندگیاں ترس اِنت۔
آیاں گوشتگ کہ ما یک انچیں چاگردے ءَ زند گوازینگ ءَ ایں کہ اد ءَ مردم چہ ریاست ءِ نیمگ ءَ ترس آماچ کنگ بوگ ءَ اَنت۔ جاور ھما جاہ ءَ سر بوتگ اَنت کہ مردم چہ وتی منشا ءَ دم کش اِت نہ کنت۔
آیاں گوشتگ کہ اد ءَ بازیں کچے ءَ بلوچ ورنا، مرد ءُ جنین بے میار ءَ زندانی کنگ بنت ءُ آیانی بابت ءَ کھولاں ھم سرپدی نہ دے اَنت۔
