کیچ: چہ شال ءَ پاکستانی پوج ءِ دست ءَ زوربیگواہ کنگ بوتگیں بلوچستان یونیورسٹی ءِ پارمیسی ڈپارٹمنٹ ءِ نودربر شھزاد ء منیر ءِ مات رزیا بلوچ ءَ گوں کھول ءِ آدگہ مردماں تربت پریس کلب ءَ پریس کانپرنس کرتگ ءُ گوشتگ کہ پاکستانی پوج ءَ شھزاد چار دسمبر ءِ شپ ءَ چہ شال ءِ ھند ایسا نگری ءَ آئی کوٹی ءَ آوار جتگ ءُ بیگواہ کرتگ۔ شھزاد ھیرونک ءِ جھمنند اِنت ءُ یونیورسٹی ءَ چارمی سمسٹر ءِ نودربرے۔
رزیا بلوچ ءَ گوشتگ کہ منی زھگ ابید چہ کانودی کاروائی ءُ بے میار ءَ بیگواہ کنگ بوتگ کہ چہ ایشی ءَ مئے سرجمیں کھول سسائی جنجالانی دیمپان اِنت۔
آئی گوشتگ کہ منی زھگ بے میار اِنت آ گوں دگہ سیاسی چست ءُ ایراں ھوار نہ بوتگ ءُ نہ کہ آئی سر ءَ دگہ بھتامے ھست۔
رزیا بلوچ ءَ گوشتگ کہ شھزاد سمسٹر ءِ چکاس ءِ سرجم کنگ ءَ پد دومی روچ ءَ گس ءَ آیگی بوتگ بلے چکاس ءَ پد زوت آ بیگواہ کنگ بوتگ۔
آئی ءَ گو ریاستی ادارہ ءُ سرکار ءَ دزبندی کرتگ کہ مارا انساپ دیگ بہ بیت ءُ مئے زھگ زوت آجو کنگ بہ بیت۔
