کیچ: پاکستانی پوج ءِ دست ءَ زوربیگواھیں ورنا ساجد اھمد ءِ کھول ءَ آئی زوریں بیگواھی ءِ بگیری ءَ تُربَت پریس کلب ءَ پریس کانپرنس کرتگ ءُ گوشتگ کہ ساجد اھمد یک وانندگیں ورنایے کہ آ گوں بلوچی لبزانکءَ ھمگرنچ بوتگ۔
آئی کھول ءِ گوشگ اِنت کہ ساجد اھمد 30 نومبر ءَ چہ پَنجگُور ءِ ھند گوارگو ءَ بیگواہ کنگ بوتگ ھما اِنت کہ آئی ھچ ھال نیست کہ آ چون ءُ کج ءَ اِنت۔ آئی زوریں بیگواھی ءِ سوب ءَ ما سسائی جنجالانی دیمپان ایں۔
آئی کھول ءَ بژن درشان کرتگ ءُ گوشتگ کہ ساجد ءِ بگیری ءَ سوشل میڈیا ءَ جتائیں پیک آئی ڈیاں دروگیں پندل سازی کنگ بوگ ءَ اِنت ءُ آئی ءَ ناشرکار پدّر کنگ ءِ ردیں جھد کنگ بوگ ءَ اِنت کہ ما ایشی ءَ ایر جن ایں۔
کھول ءَ گوں کیچ ءِ انتزامیہ ءُ کانود ءِ ادارھاں لوٹ کرتگ کہ ساجد اھمد ءَ زوت آجو بہ کن اَنت ءُ آئی بیگواھی ءِ بابت ءَ راستی ءَ دیم ءَ بیار اَنت۔
