بلوچ وومن پورم ءِ سروک ڈاکٹر شلی بلوچ ءَ وتی شنگ کرتگیں درشانے ءَ گوشتگ کہ تربت یونیورسٹی ءِ کمپیوٹر سائنس بھرگ ءِ لیکچرار بالاچ بالی دوشی واتری وتی گس ءَ روگ ءَ بوتگ کہ زور بیگواہ کنگ بوتگ۔ بالاچ بالی وتی زانشتی ھیلکاری ءِ زمہ واری ءَ گوں ایمانداری ءَ پیلو کنگ ءَ بوتگ ءُ ھمک وھد ءَ گوں زانشتی کاراں سرگرم بوتگ۔ آئی زوریں بیگواھی ھمے چیز ءَ پیش دار ایت کہ ریاستی ادارھاں بلوچ چاگرد ءَ وانندگ بوگ دوست نہ بیت۔
آئی ءَ گوشتگ کہ ما پیسر ءَ ھم دیستگ وانندگ بھرگ ءِ زوریں بیگواھی گیش بوگ ءَ اِنت۔ چہ پوج ءِ نیمگ ءَ پیسر ءَ نودربر ھمے ترس ءِ آماچ بیتگ اَنت ءُ نوں اے درچ داں استاد، لیکچرار ءُ پروپیسراں سر بوتگ۔
ڈاکٹر شلی بلوچ ءَ گوشتگ کہ اے ھما ریاست اِنت چہ استاد ءُ نودربراں ترس ایت۔ آیانی مول یک جوانیں چاگردے ءِ جوڑشت اِنت، چونیں ھم ریاستے ءِ بنیادی لوٹ ھمیش اِنت، بلے اد ءَ جاور دگر اَنت۔
آئی ءَ گوشتگ کہ بالاچ بالی ءِ درکانودی دزگیری پہ بلوچ چاگردی دیمروئی ءَ یک تچکیں ارشے زانگ بیت۔من آئی زوتیں آجوئی ءِ لوٹ ءَ کن آں ءُ ما وتی وانندگ ءُ باسمائیں مردمانی درکانودی آوارجنی ءَ نہ من ایں۔
