بلوچ یکجھتی کمیٹی ءِ سروک سمی دین بلوچ ءَ وتی شنگ کرتگیں درشانے ءَ گوشتگ کہ کیچ ءِ ھند ھوشاپ ءَ پاکستانی پوج ءِ نیمگ ءَ آبادیانی سر ءَ مارٹر آس دیگ ءَ پنچ زھگ ٹپی بوتگ۔ یک زھگے کہ آئی جاور ناگیگ بوتگ اَنت کہ آئی ٹپانی درد نہ سگ اِتگ ءُ بیران بوتگ۔ اے زوراکی ریاستی زوراکیانی ھما دراجکشیں درچ اِنت کہ ایشی بلوچ راج چہ سالاں چکچینی ءَ جھان ءِ دیم ءَ پیش کنگ ءَ اِنت۔ بلے میان استمانی تک ءِ بے تواری اے زوراکی ءَ گیشتر کمک کنگ ءَ اِنت۔
آئی ءَ گوشتگ کہ بلوچستان ءَ ریاستی زوراکی جتائیں دروشم ءَ برجاہ اِنت۔ زوریں بیگواھی، ژانگولیں لاشانی دزکپتگ، گسانی سر ءَ بیڑ برگ ءُ لس آبادیانی سر ءَ مارٹر گولا آس دیگ ھما جاہ ءَ سر بوتگ کہ کسانیں زھگ ھم پھریز نہ اَنت۔ بلوچ ءِ بگیری ءَ آئی سرڈگار ءِ سر ءَ پہ زوراکی کشت ءُ کوش ءِ برجاہ دارگ ءَ ریاست ءَ زوراکی ءِ درسیں سیمسر گواز کرتگ اَنت۔
آئی ءَ گوشتگ کہ چہ ایشی ءَ پیش ھم لس آبادیانی سر ءَ پوج ءِ نیمگ ءَ تیرگواری بوگ ءَ اِنت ءُ ایشی کسانیں زھگ ھم جنگ بوتگ اَنت۔ پہ اے ویلانی کیس آمیدگس ءَ ھم پیش کنگ بوتگ اَنت بلے ایشی زمہ وار سزا دیگ نہ بیتگ اَنت۔ ما ھم سرپد ایں کہ بلوچ ءِ ھون مان آرگ بوگ ءَ نہ اَنت بلے ریاست ءَ اے ھونانی پسو دیگ لوٹ ایت۔
آئی ءَ گوشتگ کہ ریاست بلوچ ورنایانی لاشاں چگل دیگ ءُ آیاں ناشرکار لیکگ ءَ اِنت۔ مرد ءُ جنیناں آوار جنگ زور بیگواہ کنگ ءُ آیاں ناشرکاری ءِ نام ءَ دیگ ءَ اِنت، بلے انوں جست ھمیش اِنت کہ کودکیں کسانیں زھگ ھمے زوراکیانی نشانگ بوگ ءَ اَنت کہ ریاست اے ناشریں کاروائیاں کجام ھساب ءَ جائز لیک ایت۔
