بلوچ اسٹوڈنٹس آرگنائزیشن آزاد ءِ گْوستگیں چیرمین ابرم بلوچ ءَ گوشتگ کہ بلوچ نودربر سیاست بلوچ راجی جنز ءِ یک پُرارزشتداریں بھرے۔ بلوچ راجی جنز ءِ گیشتریں کیڈر چہ نودربر سیاست ءَ پیداک بوتگ اَنت ءُ انگت ءَ داں بوگ ءَ اَنت۔ اِشی ءِ پُرارزشت بوگ ءِ سوَب ” بلوچ راجی آجوئی ” ءِ مکسد اِنت۔ بلوچ نودربر سیاست ءَ بلوچ اِستان ءِ جوڑشت سازی (اسٹیٹ فارمیشن پروسز) ءِ کرد پیلو کنگ ءَ بازیں بودناکی ھست، بلے ھمے بودشت ءُ بودناکی وڑے نہ وڑے دارگ بوتگ اَنت، ھمے سبب ءَ بلوچ نودربرانی تہ ءَ کجام وڑیں کردے پیلو کنگ ءِ بودشت ھست بلے آ بودناکیں کردے پیلو کت کنگ ءَ نہ اَنت۔ اشی ءِ مزنیں سبب نوآبادیاتی نپسیات ءُ رواج اَنت کہ زیکیں روچ ءَ کزدن یا نازانتی (دانستہ یا غیر دانستہ) بی ایس او ءِ تہ ءَ جاہ دیگ بوتگ اَنت ءُ روچ ء مروچی ھمے چیزانی کسان ءُ مزنیں سان ھست اَنت۔
بلوچ نودربر وھدے گوں نودربر سیاست ءَ ھوار کپتگ گڑا آئی ءَ پشت ءَ وتی لوگ، مات ءُ پت، زاتی زند ءُ واھشتاں ھوار کل چیز یلہ کُتگ اَنت ءُ وتی ھرچ چیز ھمے جھد ءِ نام ءَ کُتگ۔ بلے باز وھد ءَ ھمے نودربر ءِ بودشت مُدام گوں اُگدہ ءِ کلچر، زاتی سیت (مفاد)، گروھی کلچر ءَ گیشتر برباد کنگ بوتگ اَنت۔ ھمے نودربر پہ راجی آجوئی ءِ مزنشانیں (عظیمیں) مکسد ءَ وتی ساہ ءِ سر گوزگ ءَ جاڑی بوتگ اَنت، وتی ھرچ چیز ءِ کربان کنگ ءَ ساجو بوتگ اَنت، بلے نوآبادیاتی نپسیات ءُ رواجانی پیداک کتگیں چاگرد ءَ ھمے نودربر ءَ ھما جاہ ءَ سر کتگ کہ آ نودربر ھمے دابیں رد آشوبی کلچر ءِ آماچ بوتگ اَنت ءُ وتی سرجمیں بودشتے ھمے کلچر ءِ تہ ءَ زوال کتگ اَنت۔ بزاں وھدے ھما نودربر راجی آجوئی ءِ مکسد ءَ وتی ساہ ءُ سر ءِ کربان کنگ ءَ جاڑی بوتگ اَنت، بلے ھمے نودربر پہ اُگدہ، گروھی سیت (مفادات) یا زاتی زِد ءُ کینگ (انا) ءَ وت ءَ جھد ءَ چہ یک کش کن اَنت، یا وتی سرجمیں بودناکی ءَ یک "اُگدھے” ءِ پُشت ءَ ببا دے اَنت، بلے آ نہ زانت کہ آ وت وتی بودشتاں زوال کنگ ءَ اِنت۔ پرچا کہ آ پہ ھما مکسد ءَ جھد ءَ ھوار بوتگ، بلے آ مکسد پش کپگ ءَ اِنت۔
نوآبادیاتی نپسیات ءُ رواجاں مئے سیاسی چاگرد انچوش زدگ کُتگ کہ ھمے نودربر کسان کسانیں جیڑھانی بنیاد ءَ وتی بودشتاں گل (تنظیم) ءِ تہ ءَ وتی جند ءِ سنگت ءِ ھلاپ ءَ ببا داتگ انت۔ ھمے ردآشوبی چاگرد ءِ آماچیں نودربراں ھمے داب ءَ وتی سرجمیں زور وتی جند ءِ سنگت ءِ ھلاپ ءَ ھرچ کتگ کہ آیاں اے نیام ءَ دُژمن بیھال کتگ، بزانکہ کجام بودشت دُژمن ءِ ھلاپ ءَ ھرچ کنگی بوتگ اَنت، بلے آیاں اے بودشت وتی جند ءِ سنگت ءِ ھلاپ ءَ ھرچ کتگ اَنت۔ ھمے ردیں چاگرد ءِ سان ھمے داب ءَ مھکم بوتگ اَنت کہ نودربرانی گیشتر وھد ءُ بودناکی وت ماں وتی اڑ ءُ جنجالاں گْوستگ اَنت۔ اگاں ھمے ردیں چاگرد مہ بوتیں گڑا بہ گندئے نودربرانی سرجمیں بودناکی ” بلوچ اسٹیٹ فارمیشن پروسز ” ءِ تہ ءَ ھرچ بوتگ اَت۔ راجی آجوئی ءِ جھد ءِ لوٹ ھم ھمیش اِنت کہ نودربر وتی سد در سد بود ءُ بودشتاں راجی آجوئی ءِ سیاست ءُ جنگ ءِ پلہ مرزی ءُ سما ءُ سنچ ءِ ودی کنگ ءَ کارمرز بہ کن اَنت، بلے نوآبادیاتی چاگرد ءَ نودربرانی ھمے سِکگ ءُ دربرگ ءِ وھد کسان کسانیں جیڑھاں گوں زوال بوتگ انت۔ وھدے نودربر ھمے چاگرد ءَ وتی جُھد ءِ شرتریں وھد (بزاں ھمے وھد ءَ آئی ءِ بازیں چیز سِکگ ءُ دربرگی اَنت ءُ دیم ءَ ھمے بودناکی (صلاحیت) جنز ءَ را دَیگی اِنت) ءَ زوال کنت گڑا باندا نودربر سیاست ءِ ھلاسی ءَ رند زانگ بیت کہ ما وتی وھد چنچو زوال کتگ۔ نوں ھما وڑ راجی جنز ءَ کرد پیلو کنگ ءِ زلورت بیت گڑا آ مزنیں کردے پیلو کت نہ کن انت۔ بزاں ھما بود ءُ لائکی ءِ راجی جُنز لوٹ ءَ کنت آ لوٹاں سرجم کت نہ کن اَنت۔
بی ایس او بلوچ آجوئی ءِ جنز ءِ نرسری اِنت، بی ایس او ءِ زمہ واری پہ بلوچ آجوئی ءَ بودناکیں ءُ لائکیں ورنا پیداک کنگ اِنت دانکہ ھمے ورنا بلوچ راجی آجوئی ءِ جنز ءُ اسٹیٹ فارمیشن پروسز ءِ تہ ءَ وتی مزنیں کردے پیلو بہ کن اَنت۔ بلے اگاں ھمے ورنا کالونیل نپسیات ءُ روایتانی آماچ بنت ءُ وتی ھیال (سوچ) ءُ پگر ءَ یک کالبے ءَ بند کن اَنت، گڑا بزاں آیانی سرجمیں جیڑگ، سرجمیں بودناکی (صلاحیت) بس اُگدہ کلچر، زاتی سیت (مفاد)، گروھی کلچر ءِ پُشت ءَ زوال اَنت، گڑا ھمے ورنا سرجمیں جھد ءُ سرجمیں مکسد ءَ تھنا ھمے سرپد بنت بزاں آیانی ھاتر ءَ اے جیڑہ زند ءُ مرگ ءِ جیڑہ بنت، آ اے گپ ءِ جند ءَ سرپد نہ بنت کہ بی ایس او بلوچ آجوئی ءِ جنز ءِ نرسری اِنت، بی ایس او ءِ بلوچ آجوئی ءِ جنز ءِ ھیلکاری ءِ پتّر اِنت۔ بی ایس او آجوئی ءِ جنز ءَ باسما ءُ بودناکیں (باصلاحیتیں) جھدکار پیداک کنت۔ بی ایس او ءِ پیداک کتگیں ورنا بلوچ آجوئی ءِ جنز ءُ بلوچ اسٹیٹ فارمیشن پروسز ءَ وتی مزنیں کردے پیلو کن اَنت۔ بلے کجام ھم نودربر بی ایس او ءِ ھمے کرد ءَ سرپد نہ بوتگ گڑا آ ھمے دابیں کسان کسانیں جیڑھانی آماچ بوتگ اَنت، آ ھمے سرپد بوتگ اَنت کہ سرجمیں جھد ءُ مکسد "اُگدہ گرگ” اِنت یا سرجمیں زند ھمے گروھی کلچر ءِ تہ ءَ گْوازینگی اِنت، اے ھیال (سوچ) ءُ پگر ءِ واھُندیں ورنا نہ تھنا وت ءَ زوال کن اَنت بہ گندئے وتی پند ءُ جپّا (مھنت)، اِیمانداری (مخلصی) ءُ بودشتاں (صلاحیتاں) گوں ھم زُلم کن اَنت۔ پمیشکا بی ایس او ءِ ھرچ سنگت ءَ بندات ءَ چہ بی ایس او ءِ گْواچن ءُ راستیں کرد ءِ جند سرپد بوگی اِنت کہ بی ایس او ءِ کرد چی اِنت ءُ من پرچا بی ایس او ءِ بھر بوتگاں؟ اگاں ھمے بُنکی چیزاں سرپد بیت گڑا آ سنگت ھچ وڑیں جیڑہ ءُ جنجالانی آماچ نہ بیت۔
من سرپد باں ھمے نوآبادیاتی نپسیات ءُ روایاتانی سان ءِ ھلاس کنگ ءَ بی ایس او ءِ سنگتاں اے جُستانی سر ءَ تْران ءُ باوستے بندات کنگ لوٹیت۔ ھستیں وھد ءَ بلوچ آجوئی ءِ جنگ ءُ اسٹیٹ فارمیشن پروسز ءِ ھاتر ءَ بلوچ نودربرانی کجام بودناکی (صلاحیت) درکار اَنت؟ بلوچ نودربر ءُ ورناھاں بلوچ اِستان جوڑ کنگ ءِ اَمَل (عمل) ءِ تہ ءَ کجام زمہ واری وتی کوپگاں زورگی اَنت؟ آ کجام جیڑہ ءُ رواج اَنت کہ بلوچ نودربراں آجوئی ءِ گھگیری ءِ تہ ءَ وتی سرجمیں کردے پیلو کنگ ءَ چہ دارگ ءَ اِنت ءُ آ کجام رواج اَنت کہ آیاں بلوچ نودربر کسان کسانیں جیڑھاں گوں دست گٹ کتگ اَنت؟ اگاں بی ایس او وتی اندر ءَ ھمے باوست ءَ ودی کنت گڑا بہ گندئے بلوچ ورنا راجی آجوئی ءِ جنز ءَ چہ مروچی ءَ باندا گیشتر توانگریں (توانا تریں) کردے پیلو کن اَنت ءُ زلورت ھم ھمے چیز ءِ ھست اِنت کہ بلوچ ورنا گیش ءَ چہ گیش وتی توانگریں (توانا تریں) کردے پیلو بہ کن اَنت۔ اگاں اے جیڑہ ءِ سر ءَ انوں گپ ءُ تران مہ بیت، گڑا روچ گْوزان بنت ءُ اِشی ءِ تاوان ھم گیش بوان بنت۔
بی ایس او ءِ سنگتاں نوآبادیاتی نپسیات ءُ گْوست ءِ ردیں رواجانی سرجم ءَ ھلاس کنگ ءَ "نوکیں دور ءِ زلورت ءُ بلوچ اسٹیٹ فارمیشن پروسز ءَ نودربر ءِ زمہ واری” ءِ ھیال ءِ بنیاد ءَ نوکیں شوربندی (حکمت علمی) ٹھینگ ءِ زلورت اِنت۔ اے شوربندی ءِ تہ ءَ ھرچ ورنا بی ایس او ءِ بھر بیت آئی ءَ ھما بنداتی روچ ءَ چہ آئی ءِ زمہ واری گْوشگ بہ بیت کہ تو بلوچ راجی آجوئی جنز ءُ بلوچ اسٹیٹ فارمیشن پروسز ءَ اے داب ءَ وتی کرد ءَ پیلو بہ کن۔ اگاں بنداتی روچ ءَ چہ نودربراں آیانی زمہ واری گْوشگ بنت گڑا آ اَمَل (عمل) ءِ بھر کنگ بنت ءُ آ وت ردیں روایاتی آماچ نہ بنت، آ وتی بودشتاں پہ یک اُگدھے ءِ پُشت ءَ ھرچ نہ کن اَنت، آ وتی وھد ءَ پہ کسان کسانیں جیڑھاں گوں زوال نہ کن اَنت، آ وتی بودشتاں وتی جند ءِ سنگت ءِ ھلاپ ءَ ھرچ نہ کن انت، آ زاتی سیت (مفاد) ءُ گروھی کلچر ءِ آماچ نہ بنت ءُ آیانی سر ءَ نوآبادیاتی نپسیات وتی سان ءَ دور دات نہ کنت۔ پرچا کہ کجام نودربر بنداتی روچ ءَ اے گپ ءِ بابت ءَ تچک بیت کہ من ءَ آجوئی ءِ جنگ ءَ چے پیمیں کردے پیلو کنگی اِنت، گڑا آ وتی سرجمیں زور، وس ءُ واک ءَ گل (تنظیم) ءِ نیمگ ءَ رستگیں پروگرام ءِ سر ءَ دنت ءُ ھما پروگرام ءِ تہ ءَ وتی بودشت (صلاحیت) ءَ ھرچ کنت۔ مروچی بی ایس او بہ گندئے گْوست ءِ سان ءَ چہ مزنیں کچّے ءَ آزات اِنت، بلے وڑے نہ وڑے ءَ اے سان ساڑی اَنت ءُ اِشانی سرجم ءَ ولگوج کنگ ءُ نودربر ءِ کرد ءَ گوں انساپ کنگ ءَ بی ایس او ءَ نودربراں ھمے دابیں نوکیں پروگرام دیگ ءِ زلورت اِنت۔
مئے اُمیت ءُ یکّین (یقین) گوں ھمے گپ ءَ بندوک اِنت کہ بی ایس او ءِ سنگت بلوچ نودربرانی نیام ءَ سرجم ءَ ھمے دابیں چاگردے جوڑ کنگ ءَ سوبمند بنت کہ ھرچ یک بلوچ نودربرے بلوچ آجوئی ءِ جنگ ءُ بلوچ ریاست ءِ جوڑشت سازی ” ءِ اَمَل (عمل) ءِ تہ ءَ نوکیں دور ءِ زلورتانی ھساب ءَ وتی بودشتاں گیش ھرچ کنت۔
