بلوچ یکجھتی کمیٹی( بی وائی سی) ءَ وتی شنگ کرتگیں درشانے ءَ گوشتگ کہ آواران ءِ جھمنندیں نودربر نسرین بلوچ وتی کھول ءِ ھواری ءَ ھب ءَ بوتگ۔ 22 نومبر 2025 ءِ شپ ءِ ادار دوازدہ ءَ پاکستانی پوج ءُ چیریں ادارھانی کارمنداں آئی گس ءَ بیڑ برتگ ءُ کھول ترسینتگ ءُ نسرین پہ زور آوار جتگ ءُ برتگ۔ چہ ایشی ءَ پد نیکہ آئی کھول ءَ آئی بابت ءَ سرپدی دیگ بوتگ ءُ نیکہ اے بابت ءَ سرکار ءِ نیمگ ءَ درشان شنگ کنگ بیتگ۔ آئی کھول بازیں جنجالانی دیمپان اِنت۔
آئی گوشتگ کہ اے ویل نوکیں ویلے نہ اِنت چہ ایشی ءَ لھتیں ماہ پیش شال ءَ پولیو ءِ نادراھیں ماہ جبین بلوچ ءَ ھمے وڑ ءَ ریاستی پوج، سی ٹی ڈی ءُ چیریں ادارھانی کارمنداں چہ ھاسٹل ءَ آوار جتگ۔ ھپت ماہ ءِ گوزگ ءَ ابید ماہ جبین انگت بیگواہ اِنت۔ یک نادراھیں نودربرے ءِ آوار جنگ ھمے راستی ءَ پدر کنت کہ بلوچستان ءَ زوربیگواھیانی پالیسی ءِ بنکی جیڑہ تھنا بلوچ ءِ پجار اِنت۔
آئی گوشتگ کہ بلوچستان ءَ ھمک روچ بیڑ برگ، دزگیری، زوریں بیگواھی، لشکرکشی ءُ انسانی ھکانی لگتمالی دودےجوڑ بوگ ءَ اِنت۔ ابید چہ آمیدگس ءِ کاروائی، منانک ءُ کانودی نیموناں بلوچ جنینانی دزگیر کنگ جھانی کانود، جنیوا کنونشن ءُ بنکی انسانی ھکانی پدّریں لگت مالی اِنت۔ اے ویلاں ھزاراں کھول گم ءُ رنج، ترس ءِ آماچ کرتگ۔
آئی گوشتگ کہ نسرین ءُ ماہ جبین ءِ وڑیں نودربرانی زوربیگواھی ھمے انسانی تباھی ءَ پدر کنت کہ بلوچستان ءَ وتی گڈی سیمسر ءَ سر اِنت۔ پازدہ سالی ئیں جنک ءُ یک نادراھیں نودربرے ءِ بیگواہ کنگ ھچ پھازداری ءِ پالیسی گوشگ نہ بیت۔ اے نہ تھنا بلوچ پجار ءِ نشانگ کنگ اِنت بلکیں شرپ ءِ لگتمالی لیکگ بیت۔ جنینانی زوریں بیگواھی ءَ رواجے جوڑ کنگ ءُ بلوچ ءَ ھمے گوشگ بوگ ءَ اِنت کہ آیانی جان ءُ شرپ ھم پھریز نہ اِنت۔
آئی گوشتگ کہ ریاستی رویشت ءِ مول اگاں مھلوک ءِ ترسینگ اِنت ءُ آیاں چہ سیاسی جھد ءَ گستا دارگ اِنت ،بلکیں اے مچی سزا گیش سیاسی زانشت ءَ توان بکش ایت ءُ مھلوک ءِ گھگیری ءَ گیش مھکم کنت۔ پہ بلوچ راج ءَ المی اِنت کہ اے درانسانی زوراکی ءَ جھان ءِ دیم ءَ آرگ ءَ یکجاہ بہ بنت دانکہ اے درد ءُ جنجال تھنا لھتیں کھولانی مہ بنت بلکیں پہ بلوچ راج ءَ جھد ءِ چیدگ جوڑ بہ بنت ءُ ھمے درد چہ اے زوراکی ءِ نزام ءَ کش ایت۔
