بلوچستان نیشنل پارٹی ءِ سروک سردار اکتر مینگل ءَ گوں ھوالکار اسد تور ءَ وتی گلدارے ءَ گوشتگ کہ بلوچستان سرکار ءِ واکداری داں شال ءِ زرگون دگءَ اِنت، بلوچستان ءِ آدگہ جاھاں سرکاری جاہ، پولیس تانھاں گھگیری کنوک دستیگ کن اَنت ءُ چہ ایپ سی بنجلانی دیم ءَ گوز اَنت آیاں ھمت نیست، بلے سرکار گوش ایت کہ جاور شر بوگ ءَ اَنت۔ اگاں جاورشراَنت گڑا دامگ ءُ شھدگ چی ءَ بند کنگ بیتگ اَنت۔
آئی ءَ گوشتگ کہ پیشیگیں مزن وزیر ءِ میتگ زھری گوستگیں دو ماہ ءَ گھگیری کنوکانی دستءَ بیتگ، وھدے کہ آ وت شتگ اَنت گڑا سرکارءَ لس مردمانی بگیری ءَ لشکرکشی بندات کرتگ۔ راشن بند کرتگ ءُ مردمانی ترءُ گرد ءِ سر ءَ پابندی جتگ۔ اگاں چونیں ھم مردم یا کھولے چہ زھری ءَ دگہ شھری ءَ روگ لوٹ ایت آئی ءَ ھمک چوکی ءَ وتی پچار گوشگ لوٹ ایت۔
آئی ءَ گوشتگ کہ من ءَ گوں دائش ءَ دژمنی نیست، منی سر ءَ ارش کنوک آئی ایس آئی اِنت، اے ارشانی مول سیاسی مچیانی دارگ ءُ ترس ودی کنگ اِنت۔
آئی ءَ گوشتگ کہ سرپراز ءِ وڑیں مردم بلوچستان ءِ جاوراں اے وڑ کنگ ءَ اَنت اگاں جاور شر بہ بنت گڑا سرپراز ءِ وڑیں مردم یک یونیں کونسلےءِ سیٹ ءَ نہ کٹ اَنت۔ ادارھانءَ ھم ھمے وڑیں مردم دوست بنت۔
