بلوچ اسٹوڈنٹس ایکشن کمیٹی ءَ وتی شنگ کرتگیں درشانے ءَ گوشتگ کہ بساک ءِ اولی بنجاھی پتر ءِ دیوان گل ءِ کماش اُزیر بلوچ ءِ سروکی ءَ برجم دارگ بوتگ۔دیوان ءِ تہ ءَ پجاری نشست، گل ءِ کار ءُ آؤکیں گامگیج ءِ سرھالانی سرءَ گوں دلجمی ءَ تران کنگ بوتگ۔ پجاری نشست ءَ پد گل کاری ءِ سرھال ءِ سرءَ گل ءِ بنجاھی لس دیوان ءَ بوتگیں کلیں ھبر ءُ داتگیں شَور ءُ سلاھانی سرءَ دلجمی ءَ گپ ءُ تران کنگ بوتگ۔
دیوان ءَ بنجاھی کماش اُزیر بلوچ ءَ گپ کنان ءَ گوشتگ کہ اے پما یک وش بھتی یے کہ گل ءِ سنگتاں مئے سرءَ اے بیسہ داشت ءُ مارا وتی رھشون بوگ ءِ موہ داتگ کہ ما بلوچ ورنایانی رھشونی ءَ کنان ءَ پہ آھانی منزل ءَ سر کنگ ءَ وتی ھمک جھد ءُ کوشست ءَ کن ایں۔ بلئے ایشی ھمراھی ءَ اے مئے ءُ شمئے سرءَ یک مستریں زمہ واری یے زانگ بیت کہ ما ھمے ورنایانی رھشونی ءَ کنان ءَ آیانی کردی، سیاسی، پگری ءُ تکنیکی ھیلکاری ءَ یک جوانیں ءُ جانداریں دروشمے ءَ نہ تھنا برجاہ بہ داریں بلکیں وتی ھمک وھد ءِ مستریں ءُ ھاسیں پروگرامانی بھر کنان ءَ دلگوشی دئیں۔
آئی ءَ گوشتگ کہ گل ءِ چارمی بنجاھی لس دیوان ءِ گوں سوبمندی ءَ برجم دارگ، انوگ ءُ گوستگیں سنگتانی جھد، ایمانداری ءُ گل ءِ کارانی گوں سنگینی ءَ برجم دارگ ءِ برورد اِنت۔ آیانی داتگیں پروگرام ءُ پیسلہ سازی ءُ گل ءِ ھمک باسک ءِ گوں ایمانداریں رنگے ءَ کاراں ھوار بوگ ءُ گوں دلجمیں رنگے ءَ ایشانی سرجم کنگ ءِ بنیاد ءَ گل مدام وتی کار ءُ پروگراماں دلجمیں رنگے ءَ سرجم کنت۔
آئی ءَ گوشتگ کہ گل بلوچستان ءِ جتاھیں ھند ءُ دمگاں سیاسی ءُ لبزانکی مردمانی یات ءَ لٹریری پیسٹیول اڈ دیگ ءُ بلوچ لٹریسی کیپمئین ءِ وسیلہ ءَ بلوچستان ءِ دمگاں وانگجاھانی پچ کنگ ءُ سائنس اگزیبشن اڈ دیگ ءَ ھوار بلوچ ورنایاں زانشتی، سیاسی ءُ تکنیکی پِڑاں رھشونی ءَ کنت۔کسانیں مدتے ءَ بلوچ ورنایانی گوں گل ءَ ھوار بوگ ءُ مھلوک ءِ گل ءِ سرءَ بیسہ دارگ گل ءِ پِگری ءُ جوڈشتی مھکم بیگ ءِ درور اِنت۔ گل ءِ سنگت ھمے بیسہ ءِ شرپ ءَ وت ءَ مھکمیں ءُ بودناکیں ورنا کنان ءَ راجی زمہ واریاں پیلو بہ کن اِنت۔
اپزیر بلوچ ءَ تران کنان ءَ گوشتگ کہ گل ءِ زمہ واری زورگ بگندئے سر زاھر ءَ لھتے اگدہ اَنت بلے اے مزنیں راجی ڈُبہ ءُ زمہ واری اَنت کہ مئے کوپگان اَنت ءُ اشانی پیلو کنگ ءَ کہ ما سوگند وارتگ اے راجی زمہ واریانی پیلو کنگ ءِ ھما منگ نامگ اِنت کہ آ گوں پگری پُھتوھی ءُ یکشلیں جھد ءَ بندوک اِنت۔ پمیشکا مارا وت ءَ لیکھی پارستءَ پُھتو ءُ مھکم بیگی اِنت ءُ اے زانشتی کاروان دیم ءَ جُنزینگی اِنت۔ ما یک ھنچیں وھدے ءَ راجی زمہ واری وتی کوپگاں زُرتگ کہ اے وھد اچما باز لوٹ کنت ءُ ھمے لوٹانی رِد ءَ اوشتگ ءُ دیم ءَ جُنزگ مھکمیں سیاسی جھدکارے ءِ چیدگ اِنت۔ مروچی کہ من ءَ اے زانشتی کاروان بساک ءِ دروشم ءَ گوں بودناکیں ءُ مھکمیں ورنایاں رستگ گڑا من چہ پِگری سنگتاں ھمے امیت داراں کہ آ وتی دلگوشءَ سرجم ءَ گوں گل ءِ کار، راجی لوٹ، سیاسی لوٹ ءُ ورنایانی سیاسی ءُ پگری ھیلکاری ءَ بندوک کن اَنت، گڑا من سدک باں کہ مئے اے کاروان زانشتی ءُ کردی منزل ءِ نیمگ ءَ سپر جنان ءَ یک مھکم ءُ تونگریں راجی گلے ءِ بستار ءَ بلوچ ورنایانی مھکمیں توار ءُ پتر بیت۔
چہ سرجمیں بنگپانی سر ءَ دلجمی ءَ گوں تران ءَ پد چہ کماش ءِ موکل ءَ دیوان آسر کنگ بوتگ۔
