شال: بلوچ یکجھتی کمیٹی ءِ روانک ءِ وش آتکگ ءَ آتکگیں مردمانی مچی ءَ ڈاکٹر ماہ رنگ ءَ تران کرتگ ءُ گوشتگ کہ اے زرمبشت نوں پنچمی پیز ءَ سربوتگ، پونشی بزاں 27 جنوری ءَ شال ءَ مزنیں لس مردمی مچی یے دار ایں، پہ اے مچی ءَ تیوگیں بلوچستان ءِ مردماں ھوار بوگ ءِ لوٹ ءَ کن ایں۔
آئی ءَ گوشتگ کہ ما اسلام آباد ءَ ریاست ءِ نیمگ ءَ کینگ زرتگ ءُ واتر بوتگیں، اود ءَ مئے مات کمشرپ کنگ بوتگ اَنت۔ اود ءَ مئے وش آتک ءَ آتکگیں مردمانی گون ءَ زوراکی کنگ بوتگ، آ لٹ شاپ کنگ بوتگ اَنت، مئے سر ءَ سردیں آپ ریچگ بوتگ۔ زھرشانی کنوکانی گد درگ بوتگ اَنت، اود ءَ ما درسیں زوراکی نبشتہ کرتگ ءُ آتکگیں، مارا ھمے گوشگ بوتگ کہ شما بلوچی وتی ڈیھ ءَ برو اِت، نوں ما ھمے لوٹ ءَ کن ایں کہ یکجاہ ءُ اے زرمبشت ءَ ھوار بہ بہ اِت ءُ ھمےکلوہ ءَ بدے اِت کہ چہ مئے ڈیھ ءَ در بہ کپ اِت۔
ڈاکٹر ماہ رنگ ءَ گوشتگ کہ آیاں تیوک ءَ مارا نہ بلکیں بلوچ کرتگ ءُ ناشرکار گوشتگ۔ ما آیاں گوشگ لوٹ ایں کہ ناشرکار ما نہ ایں، ناشرکار تئی ریاست ءُ آئی لشکر اِنت۔ آیاں ھزاراں بنگالی جنینانی گون ءَ بدکاری کرتگ، مئے مردماں زور بیگواہ کنگ ءَ اَنت، بلوچاں درکانودی کشگ ءَ اَنت، شما داں کدی وتی براتانی لاشاں کوپگ ءَ کن اِت ءُ داں کدی ودار کن اِت، اے ریاست مئے مردماں بیگواہ کنگ ءَ اِنت۔
آئی گوں بلوچ راج ءَ دلگوش گور کرتگ ءُ گوشتگ کہ من شمئے گھاراں شمئے میان ءَ شمئے مات ءُ گھار نشتگ اَنت کہ آیانی دست ءِ اس آیانی زھگانی اکس نہ اَنت بلکیں بلوچ راج ءِ پرزند اَنت آیان ءَ ریاست ءَ وتی آزارجاھاں بند کرتگ چہ سالاں بندیگ اَنت، ما شھیدانی پشپدیں۔
ڈاکٹر ماہ رنگ ءَ گوشتگ کہ ما اسلام آباد ءَ شتگیں ما اولی روچ ءَ زانتگ کہ اسلام آباد مارا انساپ داتگ نہ کنت۔ ھمے ریاست ءَ مئے ھشتاد سالی کماش نواب اکبر ھان ءَ شھید کرتگ، مئے جنینانی سر ءِ سریگ چک اِتگ اَنت، اے درساں ما شموشت نہ کن ایں۔
آئی ءَ گوشتگ کہ بلوچ راج درساں یاد کنت، مئے گون ءَ انساپ مئے وتی مردمانی دست ءَ اِنت۔ بیا اِت پہ وتی راجی پدیچ ءَ جھد ءَ ھوار بہ بہ اِت۔ ھما مردم کہ بلوچ ءِ نام ءِ سر ءَ گپ ءُ تران کن اَنت یا بلوچ ءِ ھونانی سر ءَ سیاست کن اَنت ما آیاں رد کن ایں۔ بلوچ راج نوں سرپد بوتگ۔
