نیشنل ڈیموکریٹک پارٹی ءِ جارکش ءَ وتی شنگ کرتگیں درشانے ءَ گوشتگ کہ بالاچ ءِ درکانودی کوش ءِ پژدر ءَ چہ تربت ءَ بندات بوتگیں زرمبشت ءَ تیوگیں بلوچستان سر ءَ زرتگ۔ اے زرمبشت چہ یک کھولے ءِ پریاد ءَ ودی بوتگ ءُ مرچی ھزارانی کچ ءَ کھولانی جھگیری ءَ کنگ ءَ اِنت۔ ایشی تہ ءَ درکانودی کوش، زوریں بیگواھی ءِ ھلاسی ءِ وڑیں شھری، کانودی ءُ مردمی ھکانی بنیادی لوٹ ھوار اَنت۔ بلے ریاست ءِ نیمگ ءَ زوراکیں شھر ءَ کجام نارائیں رویشت ءَ پیش بوتگ اَنت اے ھمے کلوہ ءَ دنت کہ بلوچستان ءِ بستار یک کالونی یے ءُ مردم چہ بنیادی ھکاں زبھر کنگ بوتگ اَنت۔ بلوچ مات ءُ گھارانی گون ءَ زوراکانی رویشت ءُ اد ءَ سرکار ءِ زوراکیانی شوندات جھان ءِ دیم ءَ پدر کنگ بوتگ اَنت۔ ایشی بگیری ءَ 27 جنوری ءَ شال ءَ بیوکیں مچی گیشتر پدر کنت۔ نیشنل ڈیموکریٹک پارٹی اے مچی ءِ شریں وڑے ءَ پلہ مرزی ءَ کنت ءُ ھوار بیت۔
جارکش ءَ دیمتر ءَ گوشتگ کہ ریاست ءِ نیمگ ءَ مدام ھمے گوشگ بیت کہ گوں گھگیری کنوکاں گپ ءُ تران کن ایں بلے بلوچ مات، گھار ءُ زور بیگواھیں مردمانی کھولانی پریاتانی گوش دارگ ءَ بے سوب بوتگ چہ ایشی ءَ پد اے گپ ساپ پدر بیت کہ اے وتگڑیں راجمستری ریاست ءِ بلوچانی گون ءَ گپ ءُ تران دروگے۔ بلکیں بلوچانی گون ءَ مڑگ ءَ تیوک ءَ یکیں ھیلہ ءَ زور ءَ کارمرز کنت، پمیشکا ما ھم اے گپ ءَ تچک کن ایں کہ اگاں ریاست ءِ کِر ءَ گپ زوریگ اِنت گڑا بلوچ ءِ کِر ءَ زور ءَ ابید دگہ چونیں ھم راھے ءِ گچین بے نپ اِنت۔
