چہ ھب چوکی ءَ زی آوار جنگ بیتگیں ورنا مارو کوہ بلوچ ء پنڈوک بلوچ ءِ کھول ءَ زھرشانی ءَ شھدگ بند کرتگ۔ زھرشانی ءَ جنین ءُ زھگاں ھوار بازیں کچے ءَ مردماں بھر زرتگ۔
زھرشانی کنوکیں مردماں زور بیگواھیں مارو بلوچ ءِ اکس ھم دستاں بیتگ ءُ آیاں پہ مارو بلوچ ءِ زوتیں آجوئی ءَ لوٹ کرتگ۔
کھول ءِ گوشگ اِنت کہ مارو بلوچ زی بیگاہ ءِ شش ءَ چہ ھب چوکی ءِ ھند دارو ھوٹل کئور ءَ آوار جنگ ءُ بیگواہ کنگ بیتگ کہ انگت ءَآئی ھچ وڑیں ھال نیست۔
آیانی گوشگ اِنت کہ ما پولیس ءِ کر ءَ شتگ ایں ءُ ایپ آئی نبشتہ کرتگ گڑا پولیس ءَ گوشتگ مارا دو سے روچ ءِِ وھد بدے اِت ما پٹ ءُ پول کن این ءُ شمئےمردم ءَ در گیج ایں۔ بلے ما پولیس ءِ گپ نہ زرتگ ءُ زھرشانی کنگ ءَ ایں ۔
آیانی گوشگ اِنت دانکہ مئے مردم آجو کنگ نہ بیت ما وتی زھرشانی ءَ برجاہ دار ایں۔
