ھزدار/شال: جتائیں ھنداں پنچ مردم آوار جنگ بوتگ ءُ ورنایانی بیگواھی ءِ بگیری ءَ زھرشانی کنگ بوتگ، شال ءَ دو زوربیگواھیں مردم آجو بوتگ۔
اھوالکار ءِ رد ءَ ھزدار ءِ ھند نال ءَ گوستگیں دہ روچاں پاکستانی پوج ءَ بیڑ برتگ ءُ چار ورنا بابل ء کمیسا، پاروک ء ائید مھمد، ابدلستار ء جان مھمد ءُ ھزیپہ ء مولوی ابدلگپار آوار جتگ ءُ بیگواہ کرتگ اَنت۔
ورنایانی زوریں بیگواھی ءِ بگیری ءَ مردماں زھرشانی کرتگ ءُ آیانی زوتیں آجوئی ءِ لوٹ کرتگ ءُ دمگ ءَ زوریں بیگواھی ءُ گساں بیڑ برگ ءُ چادر ءُ چار دیوالیانی لگتمالی ءِ ھلاس کنگ ءِ لوٹ کرتگ۔
ھمے وڑ ءَ شال ءَ پاکستانی پوج ءَ اویس بلوچ ء اے ایس آئی رھمت اللہ آوار جتگ ءُ بیگواہ کرتگ۔
دومی نیمگ ءَ ھمے ماہ ءِ ھبدہ اکتوبر ءَ چہ شال ءِ ھند ایسا نگری ءَ سی ٹی ڈی ءِ دست ءَ آوار جنگ بوتگیں نزیر بلوچ ءُ وھاب بلوچ آجو بوتگ ءُ وتی گس ءَ سر بوتگ اَنت۔
