مند ءَ زور بیگواھیں ھارون بلوچ، ھمود بلوچ ءُ پھد بلوچ ءِ کھول ءَ چہ برجاھیں زھرشانی نندانک ءَ لوٹ کرتگ ءُ گوشتگ کہ ماں گوں بلوچ راج ءُ مند ءِ باسمائیں مھلوک ءَ دزبندی کن ایں کہ گیش ءَ چہ گیش بیا اَنت مئے ھمراہ داری ءَ بکن اَنت مئے توار جوڑ بہ بنت۔
آیانی گوشگ اِنت کہ مرچی اے گرانیں ساھت ءَ مئے چم پہ وتی راج ءَ سک اَنت،مرچی ایوک ءَ مئے زھگ ءُ مردم نہ اَنت کہ بیگواہ کنگ بوتگ اَنت، چہ استان ءِ نیمگ ءَ اے گار ءُ بیگواھی ءِ روک ءُ جمبوریں آسے ھمک لوگاں مان پتاھان اِنت ھمک روچ یک ورنایے بیگواہ کنگ بوگ ءَ اِنت یا کُشندہ ٹولیانی دست ءَ شھید کنائینگ بوگ ءَ اِنت ۔
آیاں گوشتگ کہ مرچی اگاں ما ءُ شما گوں یکجاھی ءَ استان ءِ اے زوراکیانی بگیری ءَ توار چست نہ کت بے توار بوت ایں گڑا پہ جزم بزان اِت کہ ھمک روچ مئے ورنا مئے ءُ شمئے چمانی دیم ءَ چست کنگ ءُ بیگواہ کنگ بنت ،بیا اِت گوں ما ھم توار بہ بہ اِت اے زلم ءُ زوراکیانی بگیری ءَ توار چست بکن اِت۔
گڈسر ءَ ما گوں مند ءِ باسمائیں مھلوک ءَ دزبندی کن ایں بازار ءُ وتی دکاناں بند بکن اِنت بیا اِنت مئے زھرشانی ءَ گوں ما ھوار بہ بنت مئے توار جوڑ بہ بنت وتی راجی پرز پیلو بکن اِت۔
