کیچ: مند ءَ پاکستانی پوج ءِ دست ءَ زوربیگواہ کنگ بیتگیں ورنا پھد بلوچ، ھارون بلوچ ءُ ھمود بلوچ ءِ کھول ءِ زھرشانی نندانک مرچی سیمی روچ ءَ برجاہ اِنت۔
اے میان ءَ پہ گپ ءُ تران ءَ انتزامیہ اتکگ بلے آیانی لوٹ منگ نہ بیتگ اَنتءُ گپ ءُ تران بے سوب بیتگ۔
آیانی گوشگ اِنت23 اکتوبر ءَ مئے سے ورنا آوار جنگ ءُ بیگواہ کنگ بیتگ اَنت انگتءَ آیانی ھچ وڑیں ھال نیست۔ مارا سے روچ بیت کہ ما زھرشانی ءَ نشتگ ایں بلے چہ انتزامیہ ءِ نیمگ ءَ پہ مئے زھگانی یل کناھینگ ءَ ھچ وڑیں گامگیج زور نہ بیتگ۔
آیانی گوشگ اِنت دانکہ مئے زھگ یل کنگ نہ بنت مئے زھرشانی نندانک برجاہ بیت۔ ما گوں کِر ءُ کشانی نزیکیں ھندانی مردمانی گونءَ لوٹ کن ایں کہ آ بیا اَنت ءُ مئے ھمراھداری ءَ بہ کن اَنت۔
