کیچ: مند ءَ پاکستانی پوج ءِ دست ءَ زور بیگواھیں ورنا پھد بلوچ، ھارون بلوچ ءُ ھمود بلوچ ءِ کھول ءِ نیمگ ءَ مرچی دومی روچ ءَ زھرشانی برجاہ اِنت۔
زرمبش جھگیر ءِ رد ءَ پاکستانی پوج چہ مھیر ءُ آدگہ جاھاں پہ زھرشانی ءَ آیوکیں مردماں دارگ ءُ زھرشانی ءَ روگ ءَ نیلگ ءَ اِنت۔
زی ھم پاکستانی پوج ءِ جوڑ کرتگیں کشندہ ٹولی ءِ کارمنداں زھرشانی ءِ دارگ ءِ جھد کرتگ اَت بلے زھرشانی کنوکیں مردماں انگت وتی زھرشانی نندانک برجاہ داشتگ اَت۔
آیاں گوں سرکار ءُ ریاستی ادارھاں لوٹ کرتگ کہ زوت مئے بیگواھیں ورنایاں آجو بہ کن اِت۔ دانکہ مئے زھگ آجو نہ بنت مئے زھرشانی نندانک برجاہ بیتگ۔
آیاں گوں مند ءُ کِر ءُ کشانی ھندانی مردماں لوٹ کرتگ کہ آ بیا اَنت ءُ مئے زھرشانی ءَ بھر بزور اَنت۔
