شال: بلوچستان ءَ زوریں بیگواھیانی بگیری ءَ شال پریس کلب ءِ دیم ءَ برجاھیں بیگواھیں بلوچانی توار ( وی بی ایم پی ) ءِ زھرشانی گدان ءَ 5314 روچ سرجم بوتگ ءُ انگت ءَ برجاہ اِنت۔
چارشمبے ءِ روچ ءَ وی بی ایم پی ءِ سرکماش نسر اللہ زھرشانی گدان ءَ ساڑی بوتگ کہ جتائیں بھرگاں سیادی داروکیں مردم پہ ھمدردی درشان کنگ ءَ آتکگ اَنت۔
اے بارو ءَ نسراللہ ءِ گوشگ اَنت کہ ما چہ ریاست ءَ مدام ھما لوٹ کرتگ مئے لوٹ انگت ءَ ھما اِنت کہ زوریں بیگواھی بند کنگ بہ بیت یک رستری کارے، کجام مردم ءِ سر ءَ چونیں بھتامے ھست آ ڈیھ ءِ آمیدگس ءَ پیش کنگ بہ بنت۔ زوریں بیگواھی ءِ جیڑہ ڈیھ ءِ کانود ءِ رد ءَ گیش ءُ گیوار کنگ بہ بیت۔
