شال: بلوچ یکجھتی کمیٹی ءِ گوشگ اِنت کہ باند ءَ گوں وتی زھگانی ھواری ءَ چہ گساں در بہ کپ اِت ءُ بلوچستان ءِ اے گرانکدریں روانک ءَ گوستانکی وش آتکے بہ کن اِت ءُ زوراکیں ریاست ءَ چم پیش بدار اِت کہ مئے مات ءُگھار،زھگ بے کس نہ اَنت تیوگیں بلوچستان گوں آیاں اوشتاتگ۔ اگاں مرچی ما چہ وتی گساں در نہ کپت ایں اے آس مئے ھمک گس ءَ تباہ کنت۔چہ وتی گساں در بیا اِت کہ اے مات، گھار ءُ زھگاں مارا پہ مئے راجی پدریچ ءَ یک شریں راھے پیش داشتگ اگاں مرچی چہ وتی گساں در نہ کپ اِیں گڑا پد ءَ کدی ھم در کپت نہ کن اِیں۔
آئی ءَ گوشتگ کہ بلوچستان ءِ اے کاروان باند ءَ 25 جنوری پنچ شمبے ءَ سھب ءِ یازدہ ءَ ھزار گنجی سریاب ءَ سر بیت۔ اود ءَ اے کاروان ءَ شریں وڑے ءَ وش آتک بہ کن اِت، چہ ھزار گنجی ءَ بگر داں سریاب دگ ءَ ھمک جاہ ءَ وش آتک ءَ بیا اِت، بلوچستان زانشتجاہ ءِ دیم ءَ اے کاروان یکجاہ بیت۔
آئی ءَ گوشتگ کہ شال ءِ شرپمندیں مردماں شما باند ءَ یازدہ ءَ ھزار گنجی ءَ بگر داں بلوچستان زانشتجاہ ءَ سربوت کن اِت گوں وتی زھگانی ھواری ءَ اے کاروان ءِ وش آتک ءَ وتی بھرے ھوار کرت کن اِت۔
