بلوچ اسٹؤڈنٹس آرگنائزیشن آزاد ءِ جارکش ءَ وتی شنگ کرتگیں درشانے ءَ گوشتگ کہ سیزدہ نومبر بلوچ شھیدانی روچ بلوچستان ءَ ھوار سرجمیں جھان ءَ دارگ بیت ءُ راجی شھید ستک شانی ندر کنگ بنت۔ اے ھما روچ اِنت کہ ما وتی ھما گرانکدریں پسگاں یاد کن ایں ءُ آیاں ستک شانی ندر کن ایں کہ آیاں پہ بلوچستان ءِ آجوئی ءَ وتی ھون رتکگ اَنت ءُ بلوچ راجی گوستانک ءَ پہ مدامی ابدمان بیتگ اَنت۔
آئی ءَ گوشتگ کہ سیزدہ نومبر ھما روچ اِنت کہ میر مھراب ھان انگریز زورگر ءِ دیم ءَ سر جھل کنگ ءَ ابید گھگیری کرتگ ءُ پہ بلوچ سرڈگار ءِ رکینگ ءَ جنگ دیگ ءَ شھید بیتگ۔ اے ھما لیکہ اِنت کہ بلوچ راج ءِ پسگاں گچین کرتگ ءُ چہ ایردستی ءَ ابید گھگیری ءُ آجوئی ءِ لیکہ ءِ سر ءَ پہ مدامی نمیران بوگ ءِ پیسلہ کرتگ۔ چہ ھماروچ ءَ بلوچ راجی پسگاں ھمک ایردستی ءُ دری زوراکانی بگیری ءَ سینگ مک کرتگ ءُ جھد کنگ ءَ اَنت۔
جارکش ءَ گوشتگ کہ بلوچ راج ءِ نیمگ ءَ سیزدہ نومبر ھمک سال ءِ وڑ ءَ بلوچستان ءَ ھوار سرجمیں جھان ءَ دارگ بیت۔ ھمے وڑ ءَ چہ گل ءِ نیمگ ءَ ھم رسانکدر ءَ آنلائن تکشام ءَ ھوار سرجمیں بلوچستان ءَ جتائیں پروگرام دارگ بیت۔
آئی ءَ گوشتگ کہ ما گوں بلوچ راج ءِ درسیں راجی ادارھاں لوٹ کن ایں کہ اے تکشام ءَ شریں وڑے ءَ بھر بزور اَنت ءُ وتی راجی شھیداں ستک شانی ندر بہ کن اَنت۔ شما کہ کج ءَ اِت وتی راجی شھیدانی سر ءَ رسانکدر ءَ نبشتانک بہ نبیس اِت، آیانی کسہ ءُ لیکہ ءَ بلوچ راج ءُ جھان ءِ دیم ءَ پیش بہ کن اِت۔ آیانی تامراں شنگ بہ کن اِت ءُ کج ءَ ھم ساڑی اِت پرواگرام برجم بدار اِت۔
