بلوچ آجوئی لوٹوکیں سروک اَبدالنبی بنگلزھی ءَ بلوچ راجدوستیں لشکر ( بی این اے ) ءِ لگور بوتگیں کماندار سرپراز بنگلزھی ءِ گوستگیں روچ ءَ پاکستانی ھوالکارے ءَ داتگیں گلگدا ءِ سر ءَ بژن درشان کرتگ ءُ گوشتگ کہ چہ زرمبشت ءَ تچگ ملامتی یے، ھمبل ءُ وتی نزیکیں آزیزانی دیمونیاں پد اگاں کجام سروک چہ زرمبشت ءَ دزکش یا بے اوست بہ بیت اے گوستانک ءِ تہ ءَ گوں شریں لبزاں یاد کنگ نہ بیت۔ آجوئی ءِ جھد ءَ شھید بوتگیں مردم نمیران بنت، اے راہ ءَ آیانی لیکہ ءِ دیمونیانی درچ برجاہ اِنت۔ بلوچ راج وتی ایردستی ءَ سرپد اِنت۔اے جھد ءِ تہ ءَ نوکیں پدریچ جاڑیگ اِنت، بے اوست بوگ ءُ دُژمن ءِ دیم ءَ سرجھل ءَ کنگ ءَ تیوک ءَ یک کردارے نزوری بیت، زرمبشت ءِ نہ بیت۔
![](https://zrumbesh.com/wp-content/uploads/2024/01/1000207226.png)
آئی ءَ گوشتگ کہ آجوئی ءِ زرمبشت ءِ تہ ءَ جنجال، شد ءُ تن، نادراھی اے بوگی چیز اَنت۔ کجام مردم کہ اے راہ ءَ گچین کنت آ وتی درسیں واھشتاں کش ایت ءُ ہر وڑیں ناگیگیں جاورانی دیم پہ دیمی کنگ ءَ سسائی بنیاد ءَ جاڑیگ بیت۔ چہ ایشی ءَ پد اگاں کسے مال ءُ دلوت، واھشتانی رند ءَ بہ کپ ایت گڑا آئی آشوبی ھیلکاری ءُ ھمت ھلاس بیت۔ من راجی آجوئی زرمبشت ءِ سوبمندی ءَ گندگ ءَ آں، گلانی سروکی ءَ آجوئی ءِ جنگ نوکیں جاھاں برجاہ اِنت۔ سرپراز بنگزھی منی بارو ءَ ردیں گپ کنگ ءَ ابید سلاھانی چگل دیگ ءَ پد ملامت ءُ بے توار بوتیں گھتر اَت۔