بلوچ یکجھتی کمیٹی ءِ سروک سمی دین بلوچ ءَ زور بیگواھیں شبیر بلوچ ءِ زوریں بیگواھی ءِ سالروچ ءِ درگت ءَ وتی درشان ءَ گوشتگ کہ شبیر بلوچ ءِ زوریں بیگواھی ءَ مرچی نُھ سال سرجم بیتگ۔ یک باسمائیں سیاسی ورنا ءُنودربر سروکے ءِ میارءِ بنیاد ءَ شبیر بلوچ پاکستان ءِ بندیگجاہ ءُ زندانانی تہ ءَ بندیگ اِنت۔ آ ھم ھما ھزارانی کچ ءَ ورنایانی تہ ءَ یکے کہ آ وتی مردمانی تہ ءَ بیتگ ءُ سیاسی زانشت بکش اتگ ءُ ھمے زانشت ءِ مھکمی یک میارے جوڑ کنگ بیتگ ءُ سالاں بیگواہ اِنت۔
آئی ءَ گوشتگ کہ شبیر ءِ زوریں بیگواھی ءَ پد سیما ءُآئی کھول ءَ پہ آئی آجوئی ءَ ھمک در ٹک اتگ، برے دراجکشیں نندانک داتگ، برے زھرشانی کرتگ، برے آمیدگس ءُ کمیشناں پیش بیتگ۔ ریاست ءَ دروگیں پندل ءُ جتائیں نیمونانی پارست ءَ آیانی جھد ءُ اوست ءِ پروشگ ءِ جھد کرتگ، بلے سیما ءُ زرینہ مرچی ھم پہ شبیر ءِ واتری ءَ وداریگ اَنت۔
سمی دین بلوچ ءَ گوشتگ کہ نُھ سالانی دراجکشیں جھد ءَ ابید مرچی ھم سیما ءُ زرینہ دگانی سر ءَ نشتگ ءُ پہ شبیر ءِ آجوئی ءِلوٹ ءَ کنگ ءَ اَنت۔ شبیر ءِ یل کنگ ءِ مرچی ھم گمان مہ بیت بلے سیما ءِ اے یکشلیں گھگیری ءُ توکل وت یک جھدے ءِ چیدگ جوڑ بیتگ۔
