بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ نہ ترسیں سروک زبیر بلوچ ءِ پاکستانی پوج ءِ دست ءَ کوش گوں ترندیں دانکاں ایر جتگءُگوشتگ کہ زبیر بلوچ یک سیاسی کارکن، انسانی ھکانی وکیل ءُ بلوچ راجی پدریچ ءُراجی آجوئی ءِترندیں توارے بیتگ۔ آ نودربری ءُ لس سیاست ءَ وتی راھبندی لیکہ ءُ توانمندیں توار ءِ برورد ءَ ھمک مردم ءَ دوست بیتگ۔ آئی وتی زندءَ پارلیمانی نزام ءَ ھک ءِ گرگ بے کار لیک اتگ ءُ لیکھی سیاست ءِ گون ءَ ھمگرنچ بیتگ۔ ھما جاہ ءَ کہ گپ جنگ گران یا نہ بوتگ ھمود ءَ نہ ترسیں زبیر ءِ توار جسکگ ءَ بیتگ۔ ھمے سوب اِنت کہ مرچی بلوچستان ءَ درسیں بھرگاں سیادی داروکیں مردم آئی شھیدیءَ پاکستان ءِ زوراکی ءَ ایر جنگ ءَ اَنت۔
آئی ءَ گوشتگ کہ زبیر بلوچ بی ایس او ءِ گوں ھما گروپ ءَ ھمگرنچ بیتگ کہ آ پارلیمانی پارٹی اِنت۔ ھمے ربیت اِنت کہ ھمے پارٹی ءِ جھلی نودربر گل ءِ باسک چہ نودربر سیاست ءَ پارگ بنت گڑا ھما پارٹی ءَ ھوار بنت ءُ ھمایانی سیاست ءَ کن اَنت۔ بلے زبیر بلوچ ءَ آ ربیت نہ من اتگ ءُ چہ پارلیمانی پارٹی ءِ بھر زورگ ءَ ابید گوں بی این ایم ءِ سروکاں ھال کرتگ ءُ وتی سیاسی سیادی گوں لیکھی پارٹی ءَ ھمگرنچ کرتگ ءُ داں گڈی دم ءَ اوشتاتگ۔ آئی گوشگ بیتگ کہ وتی مرگ یا چہ شھیدی ءَ پد بلوچ راج ءَ گوشگ بہ بیت کہ زبیر بلوچ راجی آجوئی ءِ یک سپاھی یے بیتگ ءُ آئی زندگی ءِ مول بلوچ راجی آجوئی ءُ بلوچ راجی جھد ءَ بیتگ۔
ڈاکٹر نسیم بلوچ ءَ گوشتگ کہ اود ءَ سیاست ءَ بی این ایم ءِ وڑیں آجوئی لوٹوک ءُ آشوبی پارٹی یے ءِگون ءَ پہ جار چہ پاکستان ءِ سوب ءَ کس ھوار بوت نہ کنت۔ پمشکا کہ کجام ھم مردم ءِ باسکی زانگ بہ بیت گڑا پاکستان پہ آئی کشگ ءَ چک ءُ پد نہ بیت۔ سیاسی کارکنانی کوش پاکستانی پوج ءِ دودے جوڑ بیتگ۔ زبیر چہ پارٹی ءِ پالیسانی سوبءَ وتی پجار درا نہ کرتگ بلے چہ آ کارانی چیر دیگ ءَ ابید ھم زانگ بیتگ پمشکا پاکستان ءَ نشانگ کرتگ۔ چارشمبے 24 ستمبر 2025 ءِ سھب ءَ آئی گس ءِ سر ءَ ارش کنگ بیتگءُ سکا تیرگواری کنگ بیتگ سھب ءَ آ گوں وتی سنگت نسار ءَ ھوار شھید بیتگ۔
ڈاکٹر نسیم بلوچ ءَ گوشتگ کہ پاکستانی پوج ءُ آئی چیریں ادارہ زبیر بلوچ ءِ وڑیں ورنا ءُ سروکاں اوپار کرت نہ کن اَنت چی ءَ کہ ھمے وڑیں سروکانی جھد ءَ پاکستانی پوج ءُ پاکستان ریاست ءِ زوراکی بلوچ راج ءِ دیم ءَ پدر کرتگ اَنت۔ آیانی زانت ءُ زانشت ءَ بلوچ راج ءُ پاکستانی پوج ءِ میان ءَ سیادی پاشک کرتگ۔
آئی ءَ گوشتگ کہ مارا پھر اِنت شھید زبیر بلوچ بے توار ی ءَ ابید گھگیری سیاست، جھد ءُ راستی ءِ راہ گچین کرتگ۔ آ پارٹی ءِ شرپمندیں بھر ءُ ھمدردے بیتگ۔ بی این ایم ھمے کول ءَ کنت شھید زبیر بلوچ ءِ ھون زوال نہ بنت۔ ما گوں میان استمان، انسانی ھکانی گل ءُ اھوالکاراں لوٹ کن ایں کہ آ زبیر بلوچ ءِ وڑیں پر ایمنیں سروکے ءِ کوش ءَ بے توار مہ بنت بلکیں پاکستان ءَ جست بہ کن اَنت۔
