پنجگور:روکپتی بلوچستان ءِ ھند ھک آباد ( شمسر ) ءَ پاکستانی لشکر ءِ میزائل اُرش ءَ شھید بوتگیں مردمانی جنازہ ءِ نماز دوشمبے ءِ روچ ءَ تسپ پَنجگور ءَ انور جان کلب ءِ گراؤنڈ ءَ وانینگ بوتگ۔
یات بہ بہ اِت کہ 18جنوری 2024 ءَ پاکستانی لشکر ءِ میزائل اُرش ءَ بی این ایم ءِ کلانھیں باسک دوست مھمد ء مھمود پنام چئیرمین دوستا، آئی لوگبانک شازیہ، زھگ بابر دوست، ھانی دوست، چراگ دوست۔ بی بی نجمہ، ماھکان، ماہ زیب ءُ برھاد شھید بوتگ اَنت۔
شھید دوست مھمد، آئی لوگبانک ءُ زھگانی لاش شمسر ءَ گلزمین ءِ میار کنگ بوتگ اَنت۔ آدینگ ءِ روچ ءَ پنجگور ءُ کیچ ءِ جتائیں جاھانی مردم پروم ءِ جاھین ءَ آتکگ اَنت کہ شھید دوست مھمد ءِ کھول ءِ نیمگ ءَ جنازہ ءِ نماز وانگ بوتگ۔
شھید بی بی نجمہ، شھید ماھکان، شھید ماہ زیب ءُ شھید برھاد ءِ کھول ءَ آیانی لاش زرتگ اَنت ءُ پنجگور ءِ تسپ ءَ روگ ءَ بوتگ اَنت کہ کوھگ ءِ سیمسر ءَ پاکستانی لشکر ءَ آیانی لاش پنجگور ءَ روگ ءَ نہ اشتگ اَنت ءُ گوشتگ کہ شما پنجگور ءَ زھرشانی کن اِت۔
شھیدانی کھول ءَ مانزمانی داتگ کہ ما پنجگور ءَ شھیدانی لاشاں بے تواری ءَ گلزمین ءِ میار کن ایں بلے آیاں انگت ءَ لشکر ءَ شھیدانی لاش روگ ءَ نہ اشتگ اَنت گوشتگ مارا چہ اسلام آباد موکل دیگ نہ بوتگ۔
کھول ءَ شھید بی بی نجمہ، شھید ماھکان، شھید ماہ زیب ءُ شھید برھاد ءِ لاش کوھگ ءَ گلزمین ءِ میار کرتگ اَنت۔
دوشمبے ءِ روچ ءَ شھید بی بی نجمہ، شھید ماھکان، شھید ماہ زیب ءُ شھید برھاد ءِ جنازہ ءِ نماز تسپ پنجگور ءَ انور جان کلب ءِ گراؤنڈ ءَ وانگ بوتگ کہ جنازہ ءِ نماز ءَ پنجگور ءِ جتائیں ھندانی مردم بازیں کچے ءَ آتکگ اَنت ءُ بھر اِش زرتگ۔
